Related Articles
Matupi Khuachung Ah Facang A Dih! Khuate Lei Ah Fang Man A Faak Fawn! Chinram, Matupi peng chung ah kahdohnak a fah caah ralhrang nih internet line le mawṭaw lam an phih caah facang cawk ding a um ti lo i khuate lei ah a hlannak in a lethnih man fak in cawk a si cang, tiah tualchung mi pakhat nih a chim.
“Facang a dih, Mawtaw ti ah-le minung citmi lawng an lut, Mawṭaw ngan mi le thilphur mawṭaw an um ti lo, Facang hi khuate lei ah cawk a si i, a hlan i facang pungkhat thonghra(10000mmk) in cawk tawn mi kha atu ah cun thongkul le thongnga(25,000mmk) a si cang i a fawi lo, tlawmpal ah cun facang a dih dih lai,” tiah tualchung mi pakhat nihcun a chim. Chungkhar cheukhat hna nih a hlan tein ei ding an rak i khon ko nain hiti ning tein lam a pih ko ahcun cu hna pawl ta zong cu a dih colh ve lai, tiah theih a si. “Facang cu kan ngei rih, nain atu taangmi a dih ahcun a um ti lo, cawkding zong a um lo i lam nihle atu tiang an ong rih lo, facang kong ahhin kan lungre a thei bik,” tiah tualchung mi pakhat nih Chin World Media sin ah a chim.
Matupi ahcun january 5 in phone line a pit i january 9 ah an on ṭhan, Tualchung mi nu pakhat nihcun, “Phone line a pih in khuachung ah puahkeh thawng kan theih, Facang kong tu ahcun cawk ciami kan i chiah nain chungkhar khuasa kan tam caah kan i za lai lo, lam an phih pengmi hi thinphang si ko, Facang man atu nakin a kai sual lai ka phang,” tiah a chim. January thla thawk in ralhrang le CDF Matupi karlak ah atu tiang kahdohnak a chuak lengmang, tiah theih a si. Credit: The Chin Post
