Related Articles
A tanglei bantukin kan langhtermi hi nu hna neeknak caah le nu hna zeirellonak caah ttialmi a si hrimhrim lo. Hlathlainak an tuah hnu i a tlaang piin langhtermi a si. Cu caah hi caa na rel hin (a bikin nu hna caah) fiimnak tampi in chap sehlaw zeitluk in dah leenglei nak in chunglei tthat hi a rak biapit deuh zia zong a thar in in hngalhter hraam seh. Nupi ca zongah thim deuhmi an si hrimhrim ko lai.
1. Nu pawl hi zeitluk in an sam thlaak le an sam um tuning i dawh hmanhsehlaw, Beauty Parlour kenkip zongah an sam kir in i dinter hna hmanhsehlaw an lungput a chiat le thinlung ruahnak ttha lo an ngeih a si ahcun sullam a ngei lomi samthlairem timi ah an cang ko lai. Nungak muidawh iang ngei tiah kauh awk aa tlaak rih lo, abiapi bikmi cu thinlung put tthat le ruahnak tthat kha a si.
2. Nu pawl hi an mit au i dawh ngang, an mitmu zong chim thiam loin i dawh hmanhsehlaw an mit nih minung a kah khawh siloah a mit nih mi pakhat khat ngaihchiatnak a chuahter khotu a si ahcun khakha tlangval nih kawmh dingah an duh kho hna lai lo. Cu nak cun zeitluk in mit bi nawn le mit cei pah an si ko zongah dawtnak le zawnruahnak te he minung an zoh a si ahcun zeitluk in mitmu aa dawhmi nak cun iang an ngei deuh tthiamtthiam. Mit ah hin dawhnak a um lo i mit ttheh/au ningcang tu nih mipi thinlung a laa deuh siamsuam.
3. Nu pawl hi zeitluk hmanh in an hmur hi mirang holh van i hlaan ahcun ‘Sexy’ in duhnung ko hmanhsehlaw a hmur kha mi thangchiatnak le ngaih a nuam lomi bia ah a hman a si ahcun siivai (poison) bantuk in ttih a nungmi pakhat a si. Cu nak cun zeitluk hmanh in hmur dawh lo, phi nawn te i a um ko zongah a thlummi bia le ngaih a nuammi hmur ah a hman a si ahcun cubantuk hmur cu mi thinlung a laa deuh vingving i zoh deuh an si tthiamtthiam ko.
4. Nu pawl hi zeitluk hmanh in an vun i dawh hmanhseh zeitluk in an biangno hna miltlor in le chokhleipar bantukin zoh co ko hna hmanhsehlaw a hmai biangno cu sen zilzial in thinhunnak ah a hman dingnak cha cun mi pakhat khat cung i idawhkhawhnak le mitthli luannak biangno tu ah hmang sehlaw zeitluk khin dah duh a va nun chin lai i iang a va ngeih chinchin hnga, hei tuak koh.
5. Nu pawl hi zeitluk hmanh in a thilthuam sang hmanhseh, zeitluk hmanh in a man faakmi rim thawthaw zihmui i kaap hmanhseh, zatlang nun i zohchia le duhnung lem loin le keimah timi lungput a ngeih i a tlon leen ning a tthat lo a si ahcun mi nih a chia lei in a kong ceih a si tthiamtthiam ko lai. A zatawk tein i ttamhmoih koh, thilthuam ttha ngai ttung i duh paoh in a tlong leengmi nu nak cun zoh na co tthiamtthiam ko lai.
6. Nu pawl hi zeitluk hmanh in mipi lakah thianghlim ngai le thilthuam thiang ngai in i chok vaak leen hna hmanhsehlaw a inn lei hna a buar bak i a buar a si ahcun lohtlau a si cang, bianabia ah rawlchuannak coka te hna, ihkhun te hna, a thilri chiahnak bizuu te hna a hnawmh tuk pa lia ah khan cun nupi ruaram ah a chuak kho hlei lo. Leeng i thiang ngai ttung i inn chunglei a daithlaan a si ahcun mi nih zohchukmi le aa filhhnawmh taktak si tiah kongceihmi an si tthiamtthiam ko lai.
7. Nu pawl hi zeitluk hmanh in zatlang nun ah siseh biaknak lei ah siseh chim rel kho in bochan taktakmi si hna hmanhsehlaw a pasal cungah maw siloah a pasal le chung hna he aa rem kho lomi a si ahcun a dongh a donghnak ah a zia cu zatlang nun le biaknak zongah theih a si tthan tthiamtthiam lai. Zeitluk hmanh in leenglei ah bochanmi le thangtthatmi na va si zongah chungkhar lei a tlamtlin lo a si ahcun kha nih khan zeihmanh diriamhnak a chuahpi hlei lai lo. Cu caah leenglei nak in chunglei a biapi deuh tiah kan ti ttheu tawn.
8. Nu pawl hi zeitluk hmanh in fim seh, zeitluk hmanh in boruak ngamh taktakmi sihmanhsehlaw, pa inn i duh paoh in a chuah/vah si loah a leen peng a si ahcun cu nu cu inn pi ngei lo coka lawng i a riakmi nu tiah chim rel aa tlaak. Cu nak cun nu hi cu pasal le chimh ngaih, nu le pa tthithruainak tang i tthanglianh le inn chunglei biapi ah a chiami nu nih cun inn pi lei cu a nuamhter cingcing ko pin ah mi mithmuh ah cawisaan an hlawh khun.
9. Nu pawl hi zeitluk in Pathian bia (sermon) chim thiam hna hmanhseh, mikip sin ah zeibantuk bia chim paoh i aa thlaak khomi nak cun biachim caan zong i aa raalringmi le hmaisen nawn tein biachimmi, siloah biachim pah zong i a mitthli a tla hlah maw cutluk biachim thiam le biachim ngaih nuamh cu dah kan ti lai i mi lungthin a tawng deuh ciamciam ko lai.
