Related Articles
Pauk Chaing PDF 15 An Nunnak A Liam. Sagaing ramṭhen, Shwebo peng Hnamasayit khua le Zeephyokung khua hna mei a khangtu ralhrang pawl kahdohnak ah a tapmi mipi pawl khamh dingah a kalmi PDF hriamtlai 15 cu hriamnam a tluk lo tuk ruangah an nunnak a liam tiah C&T SHWEBO nih February 27 ah thawng a thanh.
February 25 ah ralhrang nih Hnamasayit le Zeepyokung khua hna cu hriamngan in an kah hnu ah khuachung lut in mipi 6 cu a ruang um lo in an thah leng ah khuaning piin mei an khangh. Ralhrang nih kahdohnak an tuahmi chungin a rak zaammi mipi pawl khamh dingah C&T SHWEBO le Pauk Chaing PDF pawl an kal lio ah ralhrang pawl he an i tong i kahdohnak a chuah caah PDF minung 15 nih ram caah an nunnak a pek tiah theih a si.
Kahdohnak a pawng ah ralhrang pawl hmunhma an lak caah an ruak cu char khawh colh a si lo caah February 27 lawngah kan char khawh hna tiah theih a si. Kahdohnak ruangah a nunnak a liammi PDF 15 le mipi 6 hna caah phu kan hlam hrim lai tiah C&T SHWEBO nih a thanh chih. Credit: The Chinland Post
A Dang Relchih: Putin Nih US Le Nitlaklei Ram A Zuamcawh Hna! Russian President Vladimir Putin nih cun Europe le US in economic phihkhar a tonnak kong ah Europe le nitlaklei ram hna cu faak ngai in a leh hna. Russia ram cu vawleicung ram cheukhat hna ca ah cun hnahnawk taktak an si i, Ukraine he an buainak cu caan tha ah la riangmang in, rianrang in chawleh phihkharnak le ramdang he an i pehtlaihnak vialte cu chahpiak an ton colhnak kong a chim. A luancia kum riat in khan Ukraine nih cun anmah ramchung Donbass mizapi cung ah thahnawnnak a rak tuah ko nain thlanglei ram hna nih cun an hna an i cheh riangmang i phaisa le hraimthil tawrlecheng an kuat, tiah a chim fawn.
A luancia nithum chung ah Russia nih Ukrain a tuk caah Donbass (Russia nih Ukraine ramchung state pakhat independent ram ah a cohlan mi) le Russia ramri hna ah cun daihnak a um than cang, nain Europe le thlanglei ram hna nih i tiamrual in phihkahrnak faakpi in an tuah thiam rih, tiah a langhter fawn. President Putin nih cun, “Russia hi thlanglei ram hna tel loin tuanbia ah kan rak nun peng cang bantuk in atu zong thlanglei ram hna tel loin kan nung hrimhrim lai. Biahalnak a um mi cu, Russia tel loin thlanglei ram hna hi nan um taktak kho hnga maw? Kan hmuh zau lai cu! Kan i tong than te hna lai Europe! le USA.” tiah zeirel lo ngai in a zuamcawh hna.
Thawnpang kan hlat khawh tiang ah Ukraine khualipi pahnihnak kharkiev cu Russia nih an laak cang, tiah theih a si. Hi lio ah Ukraine president thing Poroshenko chim ning ah Ukraine ralkap nih Russia Vanlawng 20 leng an thlak cang i, Russia ralkap 3500 leng an thah cang hna, Raltuknak tank 100 leng an hrawh cang leng ah Hriamphor motor 1000 hrawng an hrawh cang fawn. Russia ralkap lei nih cun Ukraine khuapi pakhat Melitopol zong an laak cang, tiah an thanh ve.
Russia lei nih cun Ukraine civil mi cung ah fahnak pek an tim hna lo i, an ralthuam chiahnak hmunpi hrawh lawng an i tim, tiah an langhter. Sinain UN lei nih cun Ukrainian civil mi 64 an thi cang, tiah an langhter. UN Refugee agency nih an langhter ning ah- Poland ramiri ah Ukraine mipi 150,000 hrawng an i dor lio i, atu dirhmun ah miung 360,000 hrawng nih an inn le lo chuahtak in ral an zaam lio, Kahdohnak hi a daih lo ahcun hinak in ralzaam an karh rih kho, tiah an langhter fawn.
