Related Articles
Kyaukse ah We Love Kyaukse timi lutlai Ko Phyo Thihazin le NLD Party thaa a pemi mino pakhat cu ralhraang nih an tlaih an thah hna i khua hrialnak lam ah an hlonh hna.
Mandalay Region, Kyuakse khuachung i minthang ngaimi We Love Kyuakse lutlai Ko Phyo Thihazin le NLD Party a ttanhmi mino pakhat hna cu ralhraang pawl nih nizaan zaan suimilam 11 ah an inn ah an luhhnawh hna hi an thah hna. Tuzing zingka ah khua hrialnak lam ah an ruak hnih ningin an hlonh hna tiah Kyuakse khuami pahnih nih an chim. Nizaan ah ralhraang pawl nih Ko Phyo Thihazin a inn ah an luhhnawh, amah hi mi hnangam tlangval a si i, mi cungah zaangfahnak a ngei tukmi zong a si. Thingkung pawl zong a cing lengmangmi a si i We Love Kyuakse ah lutlai pakhat a si.
Kyuakse ah hlei pakhat a rawk i midang bawmhnak hal loin nikum ah amah nih a kan tuahpiak dih. Hibantuk minung hi an tlaih ziah hi ti an tuah hnga, cun a hlaan i khuabawi fapa NLD Party cohlangtu cu nizaan ah an tlaih i an thah. Ko Phyo le hi ngakchia pa an ruak cu khua hrialnak lam ah an hlonh hna, zaan suimilam 11 ah an ra i meithal in an kah hna pin ah naam in an saam hna tiah Kyuakse khuami pakhat nih a chim. Ralhraang pawl nih zahan zaan ah nungak pakhat an tlaih i mawtaw cungah an tuk an velh, nungak nute cu hraamhraam in a rak tlik caah hliamhma tampi tuar buin kan sin a rak phaan kho.
Ko Phyo Thihazin a ruak hi February 6 ah a ruak kan vui lai tiah thawng kan theih. Kyuakse i ralhraang pawl a tubantuk in sualnak ngei lomi mipi pawl phunglam lo ning in an tlaih an thahnak hna ah hin Kyuakse khua Kyat Min Ton Sang, Sang upa pakhat Deputy Chief of Police hlun Han Myo Aung hi thahnawnnak le tlaihkhihnak ah aa tel tiah theih a si tiah Khit Thit Media nih a langhter.
