Related Articles
Kan theih cio bantuk in Russia nih Ukraine cu a kah ruangmang cang. Vawlei cung ramkip nih Russia President Putin cu an thloh len nain nihin tiang ahcun a chim mi zeihmanh ah a reel piak hna lo. Cutik ah Ukraine rammi hna zong hriamtlaih hram an i thok thluahmah, rammi hna lungrualnak le kaarhlaannak zoh tikah vawleicung kip nih thangtthat an hlawh.
A bik in Ukraine President a simi Volodymyr Velensky hrimhrim cu fak a hlawh ngaingai. Ram a dawtnak le miphun caah a nunnak tiang thaap a siannak te hna a takin an hmuh tikah fak lo awk a ttha ve hrimhrim lo. US zong nih Ukraine chuah taak dingin a forhfial nain ram chuah taaknak cun ram i nunnak liam hmanh kaa thiam deuh tiah a leh hna. Ram a tthithruainak zoh tikah a ttha i Russia zong nih fawi le bai in a tei lai lo tiah mi tampi nih zumh a si cang. Cu ti a si caah US ram i a laar taktakmi model pakhat Kim Kardasian zong nih a uar khunnak zong a rak langhter ve. Kim Kardasian hi vawlei cung tawttawk ttha cem zongah rak thim a si bal. Tu lio tthangthar nih cun a thei lo an um lai lo dah, a rum zong a rum i, Sexy tibantuk le taklawng i hmanh i thlak tibantuk zong a hmang ngaingaimi model pakhat a si.
Tulio Social Media ah a laar ngaimi le mipi zong nih hman ngaimi Instagram zongah 288 followers tiang zong a ngei. Cutluk cun mi laar a si, amah Instagram bak ahcun Ukraine President Velensky a lungput a uar tuknak cu a rak i chiah, US cozah nih an forhfialnak a lehning te hna lungput cu a rak uar tuk ti a lang i. Instagram ah cun “US cozah nih a himnak ah i tthil dingin an forhfial nain meithal kuan ka herh deuh tiah a leh hna” ti’n a langhter i Velensky cu Ralkap thuam in aa thuamh lio hmanhthlak kha a chiah.
