Related Articles
Moe Pay khua kahdohnak ah mipi ralkap PDF minung 20 an nunnak a liam. Shan Pyi Nay, Moe Pay khua le Warisu Pala khua pawngah ralhraang pawl le PDF pawl kahdohnak ah PDF lei minung 20 hrawng an nunnak a liam tiah thawng theih a si i hliamhma tuarmi tampi an um tiah PDF sin in thawng kan theih.
February 17 kahdohnak ah a nunnak liam mi an um cang i Moe Pay PDF minung 7 an nunnak a liam i minung 6 nih hliamhma an tuar i PDF lei doctor pakhat zong aa tel pin ah hliamhma tuarmi pawl thiarnak ding motor pakhat zong a rawk tiah thawng an chuah tthan. Hriamnam nganmi an hman caah mipi lei zong a nunnak liam mi an um i Warisu Pala khua zong mei in an khangh. Hi ka VIDEO zawn ah hin Click tuah law video cu zohkhawh chih a si lai.
A Dang Relchih: Wi Thae Ku kahdohnak ah ralhraang minung 25 leeng a nunnak a liam i vanlawng an hmanmi zong bomb in an kahpiak hna. Shan Pyinay le Kayinni Pyinay pawng i a um mi Wi Thae Ku khuapawng ah ralhraang pawl le mipi lei humhimtu karlak ah kahdohnak faak ngai a chuak i ralhraang lei in minung 25 leeng an nunnak a liam tiah Demoso mipi runvennak lei ralkap nih cathanh an chuah.
Nihin February 18, zingka ah thok in ralhraang le mipi lei ralkap Demoso (DMO-Local PDF), Moepay PDF, Lwinkaw PDF, Phekung PDF, KA, KNDF, KGZ, GPDF, GZ-21 Generation timi ralkap pawl fonh in kahdohnak faak ngai a chuak i ralhraang bawi telh in minung 25 leeng an nunnak a liam. Kahdohnak chungah DMO-PDF in minung 3 hliam an tuar, a dang phu zongah hliamtuarmi tete an um pah tiah theih a si. Kahdohnak chungah hliamhma faak ngai in a tuarmi ralhraang phu cu mawtaw nganmi pahnih he an kah hna pin ah zaanlei suimilam 2 PM hrawngah vanlawng pahnih zong PDF phu fonh nih bomb in an kah hna tiah thawng kan theih.
Nihin kahdohnak ah ralhraang pawl cu Warizu Pali khua pawng i mipi pawl inn le lo cu mei in an khangh. Ralhraang pawl hi Moepay khua kahdohnak chungah hliamhma faak khun in an tuar i ralhraang bawmtu dingin a ra dingmi an um tthan caah PDF phu lei in meithal kuan tibantuk zong Emergency in bawmh kan/an herh tiah thawng kan theih tiah Delta News Agency nih a langhter.
