Related Articles
Asia Ram Ah Covid Variant Thar BA2 A Karh: Asia ram cheukhat ah cun covid zawtnak a thar in a karh ngai ṭhan cang i, nizan March 30 tiang ah khan covid zawtnak minung 100,000,000(sing thongkhat) sinah hmuh ṭhan a si. Asia ram ah hin nihnihkhat ah covid zawtnak singzakhat hrawng hmuh a hung si caah vawleicung pumpi tuak in covid-19 zawtnak hmuh a si cang mi 21% cu Asia ram ah hmuh a si.
A bik in South Korea, China le Vietnam ah cun covid variant thar BA2 cu a karh tuk i, Covid zawtnak a ngei mi 86% ah cun hi zawtnak thar BA2 hi hmuh a si, tiah World Health Organisation(WHO) nih cun a thanh. Atu dirhmun ah cun South Korea hi covid zawtnak aa chawnh tam bik ram an si lio i, vawleicung pumpi zawtnak aa chawnh thar hmunli ah hmunkhat(1/4) cu South Korea a si.
China zong ah covid variant thar BA2 hi a karh tuk caah Shanghai khuapi cu lockdown kalpi cuahmah lio a si i, tukum chung lawng ah minung 45,000 hrawng zawtnak aa chawnh mi an um cang. China ah hin ramchung 90% (Za ah sawmkua) cu covid raikhamsii chunh an si cang ko nain raikhamsii nih a kham hlei lo in a lang. Covid zawtnak ruangah hin Asia ramchung hmunkip ah minung singhra leng nunnak a liam cang.
Russia Nih Ukraine A Tuknak A Dorh Deuh Cang Lai: Nizan tihni i Turkey ram ah Russia palai le Ukraine palai hna nih remdaihnak ding tonbiaruahnak an ngeih mi nih cun theipar ṭha chuah dawh a si, Russia nih Ukraine a tuk cu a dorh deuh cang lai cang a chim. Ram pahnih Presidents; Ukraine President Volodymyr Zelensky le Russia President Vladimir Putin hna ṭong tonbiaruahnak a ngeih khawh nakhnga hmalak cuahmah a si.
Russia palai hna nih cun Turkey ram i Ukraine he tonbiaruahnak an ngeih mi nih sullam a ngeih kong an chim. Hi tonbiaruahnak thawng hin Ukraine tukdohnak cu donghternak lam aa hon zong ruahchannak an ngei. Ukraine palai hna zong nih Turkey ram i biaruahnak nih cun ṭhatlei a panh kong an thanh ve.
Russia ralkap nih cun Ukraine khualipi Kiev lengah Chernihiv khuapi tukdohnak cu dorh deuh ding i an i kam kong an thanh. Russia Deputy Defence Minister Alexander Fomin nih cun, “Hi tonbiaruahnak hi ram pahnih hna nih theihthiamnak an ngeih khawh hnakhnga le hmailei tonbiaruahnak a um ṭhan khawh nakhnga karhlannak pakhat a si,” tiah a chim.
