Related Articles
Kalay Myo hnawm hlonhnak mawtaw pawl cu mipi ralkap hna nih chikhat an i hlaan tiah thawng kan thanh. Kalay myo ah hnawm hlonhnak mawtaw pathum cu Kalay Civil Army Force nih chikhat kan i hlaan ta i mipi nawlngeihnak in a chuakmi cozah thar nih an kan uk tikah kan in peek tthan hna lai tiah nihin March 31 2022 ah cathanh an chuah.
Hi hnawm hlonhnak mawtaw hi March 29, Sgyi hlei pawng ah mipi lei ralkap nih an chuhmi hna a si, Kalay Civil Army Force i cathanh chuahmi ahcun mipi cozah a chuah tthan tikah le a tu lio dothlennak ah a herh caah a dik lo ning in uknak a laatu hna kuttang ah a um mi Non-CDM kut chungah hi mawtaw pathum hi anmah ta a si i kan mah ralkap pawl nih kan laak i kan i chiah chung tiah thawng an thanh. Federal Democracy siinak in mipi pawl nih an thim mi cozah thar a kai tthan tikah kan in khirh tthan te hna lai ti zong an langhter chih.
Hiti mawtaw an laakmi ruangah Kalay myo i a um mi ralkap bawi pakhat nih Tahan bazaar le a pawngkam vialte mei in kan khangh lai tiah anmah he aa naihmi mipi pakhat sin ah tlerhnak bia a chim. Non-CDM kut ah a um mi mawtaw hna hi kan hman ruangah mipi pawl caah hnawm hlonh a nuarhternak a chuah a si ahcun mipi ralkap lei kan daithlan ruangah a si tiah mipi sin zongah nawlnak an tuah hna. A tutiang mipi pawl harnak an ton lonak ding caah ralring tein rian an ttuan i a dik lomi cozah le ralhraang a cohlangtu mipi pawl sin ah remlonak kan tuah bal lo tiah thawng an thanh tiah Zalen nih a langhter.
SAC Ralkap le CDF – Matupi Kahdohnak Ah SAC Ralkap 14 An Thi I Hliamtuar An Tam: Chin ramkulh, Mindat In Matupi lei ah a kalmi SAC ralkap mawtaw run don ah Matupi in Mindat lei ah a kalmi SAC ralkap hna cu Nihin March 31 zing ah CDF- Matupi nih voihnih an kah hna i SAC ralkap 14 an thih pin ah hliamtuar an tam tiah theih asi.
” Ralkap thazang 80 veve hrawng in rallam ka hnih in an sial caah CDF- Matupi nih kan kah hna, Kan kamhmi bomb an i lamh ruang ah 11 hrawng an thi, hliamtuar an tam, Zing slm 7:40 hrawng ah hnu an kir tthan, 9:10 ah thazang an i chap i an van kan nawr tthan i kan i kap i SAC ralkap 3 an thi tthan. 9:50 hrawng ah Chianpian khuathar lei ah an kir ttham, Khuapi chung i Mizapi mawtaw lungphurhnak mawtaw pawl an hman i thazang an i chap ” tiah CDF- Matupi in ttuanvo ngeitu pakhat nih a chim.
Matupi in Mindat lei a kalmi SAC ralkap hi 150 hrawng an si i Chianpian khuathar ah an um ko rih tiah theih asi, Nizaan zong ah CDF- Matupi nih annkah cang hna i 2 an thah cang hna. SAC ralkap mawtaw 84 hna cu Magwe ramtthen Kyauhthuh in Mindat ah an lut i Mindat in Matupi ah thilri le riahcaw chan ding in March 24 in an i thawh, March 29 ah CDF- Mindat nih lampi ah an kah hna i SAC ralkap 29 an thi tiah CDF- Mindat biachimnak nawl ngeitu nih a chim.
