Related Articles
Kalay Peng Ah Kahdohnak A Chuak, SAC Ralkap 7 An Thi + Kahdohnak Thawng Sagaing ramṭhen, Kalay peng, Awngchainta (အောင်ချမ်းသာ) khua ah rallam sialtu SAC ralkap hna le CNDF, PDF-Kalay phufonh cu nihin March 20 chun suimilam 12:30 hrawng ah an i kap i, cu kahdohnak ah cun SAC ralkap lei in a tlawmbik minung 7 an thi, tiah theih a si. Kahdohnak suimilam 1 hrawng an rauh hnu ah, mizapi vengtu ralkap phufonh lei hliam tuar um loin hnu an tolh kho, tiah CNDF nih cathanh an chuah.
Tamu Peng Kahdohnak Ah SAC Ralkap 12 An Thi: Sagaing ramṭhen, Tamu peng, India ramri, Naga Tibual kam ah umhmun khuar mi SAC ralkap pawl cu PDF Tamu le Students Force hna nih March 20 zing ah an kah hna i SAC ralbawi 2 tel in ralkap 12 tluk an nunnak liam, tiah theih a si.
Kahdohnak ah PDF Tamu le Students Force in thi le hliam an um lo, tiah theih a si. SAC ralkap 12 an thi ti hi PDF Tamu le Student Force nih an fehter nain kahdohnak hmun pawng i a ummi siizung ah cun miruak hlaiter le ai hliammi a vun i thlop mi an um lo, tiah theih a si. Credit: The Chin Post
NUG Cozah Union Minister Naw Susanna Hla Hla Soe FBR Nih Ralṭhat Laksawng An Pek: National Unity Government(NUG) in Ministry of Women, Youth And Children Affair Minister, Naw Susanna Hla Hla Soe cu Free Burma Ranger(FBR) nih ralṭhat laksawng (Bravery medal) an pek, tiah FBR nih an thanh. Naw Susanna Hla Hla Soe hi harsatnak ton lio ah mipi lei ah ṭang in Myanmar ram ah Federal Democracy ser a si khawh nakhnga raltha ngai le faak piin a cawlcangh ruangah medal pek a si, tiah FBR nih an langhter.
Naw Susanna Hla Hla Soe hi 2020 Election lio ah Yangon ramṭhen in Karen miphun aiawh in MP a rak cuh i, NLD party in vote 106,114 (71.75 %) he teinak a rak hmutu a si. Myanmar Women’s Affair Federation le Women’s Peace and Security Issues ah Chairman a si i, Karen Women’s Empowerment Group(KWEG) zong ah Director a si.
