Related Articles
Nihin March 26 cu Chin ramchung ah kahdohnak lawngte a chuak. Matupi zongah an i kaap, Falam peng chung Rihkhuadar zongah an i kaap cun Hakha le Gangaw karlak zong ah an i kaap tiah theih a si. Cun tuzing ah CNDF pasalttha minung paruk zong ralhraang nih an tlaih hna tiah kan theih.
Mindat khua le Matupi lam aa tonnak zawn ah SAC ralhraang le Chinland Defence Force-Mindat zong faak ngai in an i kaap tiah theih a si. Ralhraang nih Signal tung (tower) vialte an control dih caah thawngpang tthittha in theih khawh a si lo tiah an chim, kaphnih in a thi mi zong an tam kho tiah zumh a si. Kanpetlet zongah an i kaap tiah theih tthiamtthiam a si, zing in tutiang an i kaap i bomb le meithal thawng hi a lang in kan theih tiah pawngkam um mi nih an chim. Civil minung pakhat zong kuangfang nih a kheen caah faak ngai in aa hliam tiah theih a si.
Tuzing zongah hmun hnih in ralhraang thazaang ceilak he Chinland Defence Force-Hakha le CNA an umnak hmun ah va fuh hna tiah kan theih. Tuhi an i kaap cuahmah lio a si i hmun hnih bak in an kulh hna caah thinphang ngai a si ko tiah theih a si. Hi an i kahnak hmun hi Hakha khuapi le Gangaw, Magwe region karlak a si i, Ralhraang nih hriamnam ngan le thazaang ceilak he an kah hna tiah thawngpang a leeng.
Cun nihin zingah Rihkhawdar gate i CNDF nih thantaar an thlaimi cu SAC ralhraang nih an thlaak piak tthan hna, thazaang ceilak he an luhhnawh hna i ralhraang nih CNDF pasalttha minung paruk zong an tlaih hna pin ah motorcycle tam ngaite zong an khanghpiak hna tiah kan theih. Chin ram hi biatak tein kah le tuk an timh cang ti cu a fiang ngaingai, kan sikhawh tawk in thlacam bawm cio hna usih.
