Related Articles
Chunmang (Thantlang ah Chikhat) Khua a linhtuk caah tuang lai ah ka it. Facebook ka zoh. Sau ial ka zoh hnu ah ka mitku. Kai hngilh lai te ah ka hawile an ra. Ka tho. “Thantlang tlun kan in sawm hih” ti si ko. Kai tim i kan kal colh. Thantlang ka hmuh lonak a sautuk cang caah kai ngaih pah, ka zenh pah. Ruaphai kan phak ah khin, “Hi ka hi zudawn kan riah tawnnak a si” tiah ka hei chimh pah hna. Laipawnglung kan phan. Mi tlungkal kan tonmi hna an tam ngai, ka hmuh bal lomi ko an tam khun. Hauka kan phan. Khua cuanh ta loin kan lan colh. Khua chung kan hon luh cu… Elaw khei… Ka ruahnak nakin a tha deuh ving. Ram dang phanmi hna kai lawhter.
Atu hi pei Sui Thantlang taktak cu a si ko hi, ka hei ti. Ka hmuhmi hna paoh hi a mirh lomi an um lo, an hani lang dih. Khua chungah minung an tampi. Cu lakah cun khual zong an um ngai. Ram dang muisam kengmi zong an i chawk lulh ko, hmanthlaknak nganpi i oih buin. Khua upa pakhat nih, “Annih khi cuka rammi, vei company ngeitu an si. Thantlang sersiamnak ah a kan bawmtu an si. Cun annih zong khi ram dang in, cu NGO a ngeitu an si. Tampi an kan bawmh ve”, tiah a hun chim luaimai. Pathian nih bawmtu tampi a kan pek mu, ka hei ti.
Thantlang ah ka hmuh bal lomi inn muisam (pungsan) ko a tam. “Ho te inn?”, tiah ka hal hna. “Anmah inn hmeteh! Annih cu kir cut hlan in pei inn muisam hna an rak i suai cia cu”, tiah an ka leh. Ziah hme ka rak i suai cia ve lo aw, tiah ka cal kai beng.Zanlei ninem ah tarnu pakhat he kan i tong. “Ka pi, zeitin, nan tlamtling maw?”, tiah ka hal. “Ka fa, Bawipa a thatuk. Zeizong vialte hi ka ruahnak nakin a tlamtling deuh. Ka naule inn kha a rak kaang lo le atu ah cun an ka hngar ko rawh hih”, lunglawmhnak mithmai he a ka leh.
Amah belte, kan inn ka kawl len nain ka hmu lo. Kan innhmun ah inn nganpi a rak um. Cucaah inn chung lut ngam loin inntual ah ka dir. Innhmun a kan cawtu dah ngai ka hngalh lo ee, tiin khua ka ruah lio ah ka nu aw ka theih. Hnu hmai kai her i, “Inn chungah rak lut ko law”, a ka ti. Inn chungah ka vung luh cu, ee khei aa, kanmah chung lawngte. Cucu kanmah inn a rak si diam ai.
“Bawipa, na kehlei kut in na kan thluk i na orhlei kut in na kan tun than caah kai lawm tuk”, tiah thla ka cam. Cun, thudan sau ah ka zau, kai hngilh. “Tho cang, mileng an ra hih”, tiah an ka thangh. Ka hun thawh cu kan zaamnak pher inn chung tuang laimacir te a rak si hui ko. (A boruak le a idea ka vaivuanh sual ahcun ka ngaithiam u). Markita Mualhlun. Laaknak: TBYD Thlalang Cazual
