Related Articles
Chin Revolution Day (34) tlin lawmhnak ah The Chin Post media nih CNF/A Ralbawi Pu Solomon biahalnak an tuah, thil tampi an hal i cu chungah kan rak langhter duhmi cu Thantaar (alaan) kong hi a si. Chin miphun nih cun CNF/A Thantaar hi kan hman hrimhrim ding a si tiah a chim. Cun khuapi dah ti lo, khuate lei hi kan mah tein i uknak kan tuah cio cang i kanmah le duhning tein kan cawlcang, 100/80 hi cu kan i uk cang tinak a si. Hi zong hi a rau ti lai lo tiah a chimmi chungin tlawmpal kan van char rih.
The Chin Post nih Camp Victoria ah biahalnak an tuahmi tlawmpal te kan van langhter lai. An halmi cu tihin a si “Tubantukin dothlennak kan tuah cio i pengtlang kip zong in hriamtlai phu kan dirh cio, CNF/A cu kan nu le pa bantuk nan si caah micheu nih cun CNF/A Thantaar hi kan/an hman, cheukhat hriamtlai phu nih cun an cohlang kho ve lo i anmah tein an sermi thantaar kha an i thlai cio, hmanhsehlaw tthenkhat nih CNF/A thantaar hi kan hman hrimhrim awk a si ko tiah a timi an um. Cu caah Pu Solomon nang nih teh zeitindah na hmuh ning a si, zeibantuk Thantaar kan hman zongah a ttha ko na ti dah si loah CNF/A Thantaar bak hi dah kan hman awk a si na ti” tiah a tawifiannak in biahalnak an tuahmi kan rak langhter.
Ralbawi Pu Solomon nih cun tihin a leh “Hi Thantaar kong hi khua/ram kip ka phaaknak kip ah ka aupi mi a si. Chin National Flag timi hi Chin miphun nih a hlaan ah kan ngei bal lo. Kawl kuttang ah kan um tikah Pyine thantaar lawng kan rak ngei cun voi zeizat ko dah an rak kan thlen piak kha a si. Hi dothlennak ah an theih lomi pakhat cu CNF/A Flag hi ram kip hmunkip conference tuah tikah Chin National Flag tiah pom mi a si. Cun CNF/A zong nih thantaar dang a tuah ti lo a tu kan hmanmi hi CNF zong nih a hman ve. CNF/A ralkap siseh Chairman zong nih siseh rian kan ttuan cang lai kan ti ahcun hi thantaar i tlaih in biakamnak kan tuah tawnmi a si, hi Chin National Flag hi itlaih buin biakamnak kan tuah i kum 34 kan tling cang i hi chung ah CNF/A minung 100 renglo nih an nunnak an peek cang. Ramkip le buu kip he biaruahnak kan ngeih caan zongah an thantaar cio cabuai ah an chiah bantukin hi kan thantaar hi kan cabuai bak ah kan chiah vemi a si.
Khah kan thei cio ko kha teh, Ting Sing chan lio ah kahdaihnak kan tuah lai kan ti i an thantaar an chiah, cun an hmai bak ah ngamh taktak in kan thantaar pei kan rak chiah ve kha. Khabantuk in a taar mi zei thantaar dah a um rih kan miphun ah cucu biahalnak bantuk zong in kan tuah duh hna. Hi thantaar dah ti lo cu nizaan tihni a chuakmi mah le peng le tlang cio thantaar kha an pom kho lai maw, cucu kan theih bak a herh. Cun hi Thantaar hi pumpak ruahnak le duhnak in kan tuahmi le pom mi a si lo, ramleng siseh ramchung siseh kan pa le kan nu le he ti’n biatak tein kan ceih hnu ah hi Thantaar hi kan pom mi a si.
Cun hi Thantaar hi ramchung lawng si loin International level zong in theih pimi le pom mi a si, Ting Sing chan zongah cabuai cungah chiahmi Thantaar a si. Cu caah Chin National siseh miphun ni puai pakhat khat ah nan mah peng le tlang sermi Thantaar maw nan i taar lai, si loah minung 100 leng nih biakamnak he an thih pimi le International level zong nih cohlanmi Thantaar dah nan i taar lai cucu nan mah tein i tuak ko uh” tiah Kan pa Pu Solomon nih cun a lehning a si.
Tutan biahalnak an tuahmi ah a chimmi tampi a um nain hi Thantaar konghi biapi ngai ka cattialtu lei nih ka chiah caah kan van langhter khunmi a si. Chin miphun dihlak nih cun kan i fian ngaingai a herh ko hih. Kan buai ding pakhat hmanh a um ti loh, Chin National Flag cu CNF/A nih an hman pengmi Thantaar hi a si ko tiah kan pom cio a herh. Tutan kan rak langhtermi ah tlamtlin lonak tampi a um lai, theihthiamnak he.
