Related Articles
SAC Hruaitu Min Aung Hlaing Mipi Hmuh Khawh Loin A Tlau! Nawlngeihnak latu SAC hruaitu General Min Aung Hlaing cu mipi hmuh khawh loin a tlaunak zarhkhat leng a si cang, tiah theih a si. SAC ralkap Bawi Min Aung Hlaing cu nawlngeihnak laak hnu in atu bantuk in mi hmuhlonak ah caan sau a langh lo hi a um bal lo.
A luancia February 27 ah Naypyidaw ah tuah mi biaknak lei ceremony ah aa tel hnu in nizaan March 7 tiang mipi hmuh khawhnak hmun ah aa langh ti lo. SAC hruaitu Min Aung Hlaing cu Covid-19 zawtnak a ngwih leng ah taifah in a dam lo, tiah thawngpang a chuak mi a um, nain fehternak a um rih lo. SAC hruaitu Min Aung Hlaing cu mipi hmuh khawh lo in a tlau chung ah amah changtu SAC hruaitu nih meeting a telpi tawn hna, tiah theih a si.
Kahdohnak Um Lo In Sawngdular Khua SAC Ralkap Nih Vanlawng In Bomb An Thlak: Nihin March 8 zing Sml 2 hrawng ah SAC ralkap nih Karenni ramkulh, Demoso peng, Sawngdular(ဆောင်ဒူလာ) khua cu kahdohnak um lo piin raltuknak vanlawng in bomb an thlak, tiah theih a si. Bomb thlak hnawh ruang ah Sawngdular khua Khrihfabu biakinn le mipi inn cheukhat an rawk i mipi aa khawng mi an um le um lo theih a si rih lo.
Sawngdular khua hi Demoso nitlak lei meng 5 tluk aa hlatnak ah a um mi a si i, a pawngkam zong ah kahdohnak a chuak lo, tiah theih a si. February 27 zing Sml 1 hrawng ah khan kahdohnak a chuah lonak hmun Demoso peng Lubakhu(လိုဘာခို) khua zong ah SAC ralkap nih vanlawng in bomb an rak thlak bal.
