Related Articles
Nizaan SAC ralhraang le Kan Chin ralkap Karlak kahdohnak a faak ngai tiah theih a si. Kalay in Hakha lei ah luh aa tim mi SAC ralhraang hna cu Chin National Army (CNA) nih an kah hna tiah thawng theih a si i cu kahdohnak ahcun kan ralkap lei in minung 3 nih ram le miphun caah an nunnak an pek.
Hi nunnak a pemi pasalttha hna hi khuami le tlangmi nih bochan taktakmi an si tiah theih an si tubantukin ram le miphun caah nunnak an peek tikah upatnak saang bik kan peek hna. Tutan nunnak a pemi hna hi Ramthlo, Ralpel le Dawn khuami hna an si tiah theih a si. Chungkhar an ngaihchiatnak Bawipa nih theihpiak hram hna seh.
The Hakha Times nih cun tihin a langhter “2022 March 2, Falam le Hakha kar (Ramthlo khua hrawng) kahdohnak ah CNA in minung 3 nih ram le miphun caah nunnak an pek. Nunnak petu hna hi, Dawn, Ralpel le Ramthlo khuami hna an si, tiah kan theih” ti’n an langhter.
A Dang Relchih: Ralhrang Nih Uknak An Laak Hnu In Inn 6000 Leng An Khangh Cang. Min Aung Hlaing hruai mi SAC ralhrang nih uknak an laak hnu in Myanmar ram pumpi ah inn 6158 an khangh cang, tiah Data for Myanmar nih March 2 ah a langhter. SAC ralhrang nih inn 6158 an khangh mi chung ah inn 3000 leng cu tukum 2022 January le Febuary thla chung ah khangh mi an si, tiah Data for Myanmar nihcun a langhter i ralhrang nih mipi umnak khua i sel in rallam an sialnak an langhternak zong hmuh a si.
Inn 8,158 an khangh mi hna hi hmun 165 ah an si i Sagaing ramṭhen hi a tambiknak si in, inn 3600 leng an khangh cang. A pahnihnak ah Chin ramkulh a si i, inn 1100 leng a kaang cang, pathumnak ah Magwe ramṭhen a si i inn 900 hrawng, Kaya( karenni) ah inn 300 le hmun dangdang Pago, Karen: Mandalay, Shan le Tahninthary hna ah an si.
Air Force Captain Moh Tung le SAC Ralkap Tiha Ning CDM An Tuah: SAC ralhrang kuttang rianṭuan an duh ti lo ruangah CDM tuah in mipi sin ah aa fonh mi air force ralkap minung 100 leng an si cang, tiah pyi-tuh-pan-tine phu sin in theih a si. February 22 ah captain Moh Tung(မုတ်သုံ), February 24 ah ralkap Tiha Naing (သီဟနိုင်) cu MA3 meithal zuun 2 he CDM an tuah i mipi sin ah an i fonh. Atu ah cun a himnak hmun ah an phan cang, tiah theih a si. CDM a tuahtu air force captain Moh Tung le ralkap Tiha Naing cu a rauh hlan ah mipi sin ah theihternak kan tuah hna lai, tiah pyi-tuh-pan-tine phu nih an chim. Vanlawng in mipi bomb an thlak lio cu an zoh kho ti lo ruangah ralhrang lei in machine gun a tlaitu minung 100 leng nih CDM an tuah cang.
Ram pumpi Kahdohnak Nikhat Chung Ah Ralhrang 32 An Thi; PDF 3 An Liam Ve!: Myanmar ram pumpi dohthennak tuah a si hnu nizaan March 2, nikhat chung kahdohnak ah ralhrang 32 an thi i PDF 3 an nunnak a liam, tiah Yangon Khat Tit nih cazin a langhter ning in theih a si. Cazin ning ah ralhrang lei a thi mi hi Kayin ramkulh Lay Ka Kaw/ Phalugyi ah 5, Mandalay ramṭhen Minchian peng ah 19, Sagaing ramṭhen Tanhse ah 3 le Depeyin ah 5, an dihlak 32 an si i, PDF lei in bomb i lam sual ruang ah Taningtari Palaw ah 2 le Minchian ah 1 an dih lak 3 an nunnak a liam ve.
