Related Articles
Thantlang CC kong ah a sining loin mi pakhat nih sual an phawtnak kha tihin a si. April 18 ahkhan, “Thantlang CDF i CC a rian maw nan phuah lai? Asi lo ah Thantlang CDF bawmhnak dah kan ngolh lai,” timi tlangtar in Ra Jr. Cla timi Fb acc nih a soiselnak le Thantlang mizapi sin biahalnak ca a tial.
A sining tak cu tihin a si: 2022 April 13 ahkhan Thantlang CDF CC le a naule hna cu Khuahring tlang khua pakhat ah an kal. Kal an i timhmi khua an phak hnu zaanlei sang ah CC le Khuahring tlang Admin pawl cu khuachung ah lam an leeng, an i chok. Khuachung an i chawh hi khua muih lai te unau hmelpalh hrawng khi a si. Lam an len i an kir lei ahhin, “Kahdohnak ruang ah nunnak a liam mi Salai Tum Kio philh lonak le ngaihchiat pinak langhternak ca ah,” tiin an i ken mi meithal kuan thum cu a naule nih an puah. Meithal an puah hlan ahhin, “Khuahring tlang CDF Commander (KC) pa,” sin ah nawl an hal hmasa i an puah.
Meithal thawng an theih in Khuahring tlang Admin pawl nih an lawinak lam in an bawh hna. Meithal hi hodah a puah tiah bokhal ngai in an hal hna i, meithal a puah mi pa nih, “Keimah ka si,” ati hna i cu hnu cun a herh lo tiang biaalnak a chuak. Cuti buainak a chuah hnu zong ah meeting zong tluang tein an thu i a thaizing ah an kir than ko. Hi bantuk dirhmun a si ko bu ah timh taktak in soisel le CDF bawmh ti lo ding ti phun in ca tial hi atu lio kan dirhmun ahcun i ti ngam ding le i ti siang ding kan si hrim lo.
Kan dohmi ral aa khat, kan tuk mi ral aa khat. Chim caan a si rih lo. Zeipoh nih caan hi a neih dih. Chim ding na neiha si ko zong ah i sum tualmal rih ko zei kan ti hnga. Hmun dang i an soisel mi zong hi a sining hlat hmasa uh. Atu ahcun ka rak tial rih lai lo. Biapeh Dohthlenak kan tuah mi ahhin, “A chim lei maw biapi deuh maw a tuan lei,” tihi i ruat cio hna usih. Credit: Salai Tluangte
