Related Articles
Yangon, Sagaing, Magwe, Irrawaddy Ramṭhen Ah Leirawitu Minung 7 Thah An Si: Yangon ramṭhen, Khayan peng, Takaw Kaan khua ah SAC ralkap thawngpetu tiah ruah mi Thanh Zin cu Tapyokaan (သပြုကန်) khua ah nihin zing Sml 6:00 hrawng ah min hngalh lo mi phu pakhat nih meithal in voi 9 an kah i a thi, tiah tualchung thawngthanhtu Khayan Chanel nih a thanh.
“Nihin zing ah Dalaan Thanh Zin cu Khayan in pension thlahlawh a thoh dih hnu saikal in a ṭin i, a ṭin pah ah meithal in kah a si. Amah cu U Khin Ngoih thawnghlattu ralkap in pension a la cang mi a si. Fapa 2 a ngei i amah cu SAC ralkap thawngpetu (Dalaan) a si. A ṭang ah voi 2 an khenh i a lu zong ah an khenh. A ruak cu SAC ralkap nih an laak,” tiah khua mi pakhat nih a chim.
Sagaing ramṭhen, Sagaing peng, Ngaing Pin Thar( ညောင်ပင်သာ) khua ah SAC ralkap thawngpetu tiah lunghrinh mi Win Aung cu April 20 zinglei ah min hngalh lo mi hriamtlai phu hna nih an kah i a thi, tiah tualchung thawngthanhnak in theih a si. SAC ralkap thawngpetu Win Aung a thih hnu ah Ngiang Pin Thar khua cu zanlei sang ah thil thuam sawhsawh he SAC ralkap 15 hrawng cu an phan i khuachung um mino cu an chek hna hnu ah Chitawyar (ခြေတော်ရာ) ralkap sakhan ah SAC ralkap cu an lut ṭhan, tiah theih a si.
Cu bantuk in Magwe ramṭhen, Myaing peng, Kain Taw Mah( ကိုင်းတောမ) khuakomh, Tayat Kaan (သရက်ကန်) khua ah hriamtlai Pyo Saw Htee, Soe Soe inn cu April 19 zaan Sml 11 hrawng ah min hngalh lo mi hriamtlai phu nih an luhhnawh i an kah hna, Soe Soe nupi le a fanu 2 hna cu an thi, tiah khua mi hna sin in theih a si. Soe Soe zong meithal in an kah ko nain a luat. A nupi Htey Peih, a fanu Eih Zin Phyo le Eih Zin Win hna cu an thi. Soe Soe i a fanu Eih Zin Phyo cu Non-CDM siangcachim cozah rianṭuan a si i an chungkhar ning in SAC ralkap he an i pehtlai dih hna, tiah khua mi hna sin in theih a si.
Cun, Irrawaddy ramṭhen, Nga Putaw(ငပုတော) peng, Nga Pyima(ငါးပြေမ) khua SAC ralkap khuabawi Zaw Tun cu April 19 zan Sml 9:00 hrawng ah mizapi vengtu ralkap hna nih an luhhnawh i an kah i, kah a tonnak hmun ah a thi colh, tiah theih a si. Cu SAC ralkap khuabawi Zaw Tun cu Phyo Saw Htee hna he i bawm in, khuachung mipi hna cu harnak phunphun an pek hna, mipi hna cu phaisa an chuh hna, an hro hna i SAC ralkap cu phaisa an kawlpiak hna caah atu bantuk in an finhlawm nak hi a si. Cu khuabawi pa cu Pathrin Westem Defence Force (P.W.D.F), Beach Defence Force (BDF), SinYine Guerilla Force(SGD) le West Coast Defence Force (WCDF) hna i bawm in kan kah i a ban le a paw ah voi 8 an kah i a thi, tiah theih a si.
Sagaing peng, Tuang Kyua khua zong ah Pyo Saw Htee hruaitu Htey Win cu PHOENIX (SGG) nih April 18 ah luhhnawh in an kah, a hmun ah a thi colh, tiah SGG ralkap sin in theih a si. Cu a thi mi Htey Win Cu SAC ralkap sin ah thawngpetu a si i Pyo Saw Htee he an ṭanṭi caah kan fimhlawm mi a si, tiah PHOENIX (SGG) nih cathanh an chuah. Credit: The Chin Post
