Related Articles
Kalay le Taingen kar ruak an hmuh mi chungkhar nih an hlam cang, mi thah mi si lai an zumh. 2022 April 18 ah Tedim Peng, Taingen le Hiangzing kar meng tung 29 farlong 3 le 4 kar i ruak an hmuh mi cu Tedim Peng mi Kalay khuasa Moses Kim Tuang (Ramkhel minung) a si i chungkhar nih a ruak cu Kalay khuapi ah an vui cang tiah theih a si.
Moses Kim Tuang a thihnak kong he pehtlai in chungkhar nih cun amah te motorcycle accident nak in a thi mi si lo in mi nih thah ruangah a thi mi a si lai tiah an zumh. Moses Kim Tuang kong ah, “2021 November 29 ahkhan an tlaih. December 1 ahkhan phone in an kan chawnh i ka luat cang an kan ti. Phone an kan chawmh hi zing suimilaam 10:00 ah a si. Kanmah cu kan i lawm ngai. Suimilaam 1:00PM hrawng ah Tedim a phan ding a si. Asinain ni a liam a phone kan chawnh nain kan chawn kho ti lo. Mi nih an thah a si lai ti kan zumh,” tiah Moses Kim Tuang a phak ding a hngaktu Saya Hau nih a chim.
Moses Kim Tuang a ruak hi ramlak ah a kal mi hna nih a thu a nam haw an theih i an va fuh tik ah motorcycle pakhat he lamthlang ah an hmuh. Aruak hi a rawk dih cang. Social media ah a thawngpang a kai hnu chungkhar nih an va hlat i amah a si an fehter. Nihin hi Kalay khuapi ah a ruak an vui tiah kan theih. Moses Kim Tuang a thihnak kong ah thawngfiang nihin tiang theih a si rih lo.
