Related Articles
April 12, 2022 nikhat chung lawng bakah Kawl ralhraang nih Chin mi chungin minung 5 bak an kan thahpiak. Minung pathum hi ralzaam nak in riahcaw laa dingah khuachung a rak lutmi an tlaih hna i an thahmi hna an si i, pakhat hi PDF-Kalay pasalttha a si, cun zaanlei sang ah CDF-Thantlang in pasalttha pakhat sniper in an kan thahpiak tthan hi a si.
Riahcaw laak dingah khuachung a lutmi pasalttha pathum an kan thahpiak ning hna: Hmandaw Khua Mino 3 SAC Ralkap Nih An Thah Hna Hmandaw khua mino 3 Pu Thang Bik (kum 29) le a naupa Salai Ni Dun Sang(kum 19) le Pa Lian Thio cu( kum 31) SAC ralkap nih an tlaih hna i an thah hna hnu ah an ruak van la uh tiah an chungkhar an ti hna. Kan hnuzarh cacawn ninga ni , April 8 ahkhan Pu Thang Bik le a naupa Salai Ni Dun Lian le an hawipa Pa Lian Thio hna cu ralzam in an i dornak hmun ah an eiding facang a dih cang caah Hmandaw khuachung ah an lut i facang an va rial, an rak kir lei ah Biakinn hmai ah SAC ralkap he an i tong an tlaih hna hi asi a thaizing April 9 ah an ruak van la uh tiah an chung le thawng an thanh hna.
Hmandaw khua cu khuami nih an chuahtaknak thla 2 hrawng asi cang caah khuami nih an ruak zong an la ngamlo i Taungkhayan khua an sahhlawh hnnih nizaan April 11 ah khan an ruak cu an va lak i an vui hna tiah kan theih. “April 9 Saturday ah khan cun an thi cang tiah thawng kan theih i, An ruak hmuh rih lo si tik ah kan zum kho rih lo, (တောင်ခရမ်း) Taungkhayan ummi Kan chungkhat kan va zoh ter hna le, Aaa kan si ngai ngai ko e, an kan ti e, Sunday lawng ah bia fiang kan thei ve” tiah Pu Thang Bik i a farnu nih The Chin Post ah a chim.
Ralzam nak ah eiding facang a um tilo caah ka pa nih khuachung ah facang rial a fial hna i an rial dih i an kir lei ah SAC ralkap he an i tong i an tlaih hna hi asi,Hmandaw khua cu khuapi tein kan chuahtak cang i minung pakhat hmanh khuachung ah an umlo tiah a chim chap.
PDF-Kalay in Pu Khual ralhraang nih an thahning: nihin zong ah PDF-Kalay pasalttha pahnih an tlaih hna tiah thawng theih a si. An tlaihmi chungah pakhat hi Pu Thangpuia (Myint Tin San) ti a si i San Myo vengah khuasami a si. Pakhat cu a nunnak a liam cang tiah theih a si i a min ah Pu Khual a si tiah theih a si. Nihin ah Kawl ralhraang nih Pu Thangpuia an tlaihnak hmun hi Kalay Myo, Tahan veng, Do Wine Chaung ah a si.
Cun CDF-Thantlang in pasalttha Salai Tum Kio Cung Sniper in an kahthah ning: SAC Ralkap Sniper Kut In CDF- Thantlang Ralkap Salai Tum Kio Cung A Nunnak Liam. Tuni, April 12 zaanlei slm 6:30 hrawng ah CDF- Thantlang ralkap Salai Tum Kio Cung (kum 18) cu SAC ralkap Sniper kut in a nunnak liam tiah kan theih. Chunhnu slm 2:30 hrawng ah security a la liomi CDF- Thantlang, Zahnak Battalion ralkap Salai Biak Peng (kum 16) Sihhmuh khuami cu SAC ralkap nih Sniper in an kah i a khup ah an khen nain a nunnak tu cu a him i,kuan zong nih a ruh a khen lo caah a kuan an chuah piak khawh cang.
A nunnak liammi Salai Tum Kio Cung hi Tlangkhua khuami Thantlang ummi asi i ,Thantlang ah High School cachimtu Sayamah Ngun Thim i a fapa a si, Zaanlei slm 6:30 hrawng ah JMBC Biakinn hmai ah SAC ralkap sniper kut in a nunnak a liam hi asi. Tuni ah Thantlang khuachung ah kaphnih kahdohnak ngaingai cu achuak lo nain SAC ralkap nih a thli in Sniper in an kahmi hna si tiah kan theih.
