Related Articles
Hakha ah Petrol le Dissel minung pakhat ah Kyats 20,000 man lawng dawr nih an cawkter hna. Myanmar ram chung ah ramdang in Petrol le Dissel a luh khawh ti lo ca ah rampi ning in petrol le dissel man a kai i hmun tampi ah rikhiah in an zuarnak a um bantuk in, Hakha khuapi zong ah rikhiah in meirawl haang petrol le dissel an zuarnak a um i a man zong a hlan nakin a kai deuh tiah theih a si.
Hakha khuapi chung petrol le dissel zuarnak hmun tampi lak ah a cheu cu rikhiah in an zuar lawng si lo in a man zong a hlan nakin an kaiter deuh. Cun, a hlan ning tein a zuar mi zong an um tiah khuami hna sin in theih a si.
Petrol man a kainak le rikhiah in an zuarnak kong he pehtlai in khuami pakhat nih, “Kan nih Gangaw lam lei sang hi cu a hlan nakin a man a kai deuh. Cun, rikhiah in an zuarnak zong a um. Minung pakhat ah Kyats 20,000 man lawng cawk khawh a si. April 19 ni ahkhan pung he datsi cawk ah a kal mi poh cu an lawng in an kirter than dih hna,” tiah The Hakha Post ah a chim.
Hakha khuapi chung petrol le dissel kong ah Ralhraang Council lei nih nawlngeihnak hmang in nihin tiang cu zuarter an si rih lo tiah theih a si. Aung Aung Petrol dawr tuanvo ngei pakhat nih, “Kannih dawr hi cu rikhiah in kan zuar rih lo. Duh zat cawk khawh a si ko. A man zong a hlan ning kha a si rih ko,” tiah a chim. Hakha khuapi chung ah Petrol le Dissel a man tam cem cu Datsi thawl ruk ah Kyats 15000 le Dissel tengki khat ah Kyats sing 6 leeng a si tiah kan theih. Credit: The Hakha Post
