Related Articles
Vawleicung hi thawngpang ttha a leeng kho ti lo, social media kan zoh tikah thawngpang ttha nakin thawngpang chia nih a kan nenh deuh, ramchung buainak siseh ramkhat le ramkhat buainak siseh chungkhar siseh hawikawm in siseh a kenkip in thawngpang chia lawngte theih a si cang. Social Media hmanh hi zoh ngam a si tawn lo.
Kan ngeihmi/zuatmi sattil tiang nih an tuar cang, kan vawlawi sining zoh tikah caan hi a nai ko cang ti lo awk a ttha hrimrhim lo. Tutan Russia nih Ukraine a tuknak zongah siseh nunnak a liam mi hi zeitluk in dah an hei tam cang hnga, nai te zongah Kyiv khuapi pawngah Russia ralkap nih sualnak ngei lo civil minung (pa lawngte) 500 nak tlawm lo tuksapur in lam lai ah an kut le ke an ttem hna i cuticun an calpadar ah an kahthah hna. Zinglei ah an ruak cu char an si. Zeitluk in dah ram miphun an lung hei fah cio lai ti ruah ah zaangfaak tuk an si.
Tutan zong Ukraine ram tthiamtthiam ah a si i Russia ralkap nih civil mi pakhat cu satbing (bycycle) he lam aa chawh lio ah ril ko in an kah tthan. Cu ah ngaih a chia khunmi le saram lei ttuanvo latu zong nih an celh lo bikmi cu kah a tongmi pa uico hi a si, an kah i lamthlang ah a cycle he a rilh ko bu zongah cun a uico te nih a kal taak siang ruam lo, cu nih cun vawleicung mipi an mitthli a luanter, hi hmanthlak hi Ukraine ram animal welfare nih an rak post mi a si. Zoh ah hin ngaih hi a chia hringhran ko ee.
