Related Articles
Tamu Myonay ah mipi ralkap phu 3 fonh in ralhraang he kahdohnak a chuak i ralhraang lei minung 3 an nunnak a liam. Tuni April 7 chun 12 ah mipi ralkap pawl nih lam an check lio ah Tamu lei in ralhraang motor a rak kai mi he kahdohnak a chuak tiah thawng kan theih.
Mah kahdohnak ah hin ralhraang lei in minung 3 an nunnak a liam i mah an ruak cu ralkap motor cungah an kai pi hna i ralhraang dang zong motor le cycle in hnu ah an kir dih tthan tiah mipi lei in thawng kan theih. Hi kahdohnak ah hin mipi ralkap hliamhma tuarmi hohmanh an um lo. A ra lai ding mi caan zong ah mah motor lam hi cu kan ven rih lai tiah mipi lei ralkap nih thawng an chuah tiah Zalen nin a langhter.
Monywa Le Yee Ah SAC Mytel Zung Tualchung PDF Nih An Doh: Sagaing ramṭhen, Monywa Le Mon ramkulh Yee ah SAC Mytel zung pawl cu tualchung PDF nih an doh, tiah theih a si. April 7 zing Sml 1:30 ah Monywa Mytel zung cawngtu SAC ralkap cu Unity Force Monywa le Brother Defense Force phufonh nih 40 mm in an kah, tiah theih a si.
Mizapi ralkap pakhat nih cun, “Monywa Khuapi, Kyauk Ka(ေကက္ကော) lam ah a um mi Mytel zung kan kah. Palik pawl nih an kuan a dih tiang an kan kah i an kuan a dih in an zaam. Palik pakhat hliam a tuar i, cu pa cu civil thuam aa hruk mi palik pahnih nih an hruai i an zampi,” tiah a chim.
Cun Mon ramkulh, Yee peng Aungtukhah(အောင်သုခ) sang ah a um mi Mytel zung zong, zing Sml 10:45 ah bomb puah hnawh a si i, Daw Tan Tin(ဒေါ်သန်းတင်) kum 58 a thi. Zung chung ah a um mi midang 3 zong hliam an tuar i Yee siizung ah an kuat hna, tiah theih a si.
