Related Articles
Nihin April 2, Chin State, Matupi le Mindat khuachung ikahdohnak ah ralhraang minung 50 paoh cu an thi lai tiah Chinland Defence Force-Mindat nih thawng an thanh. Nihin an i kahdohnak hi Matupi Town le Mindat Town karlak lampi ah a si tiah Chindwin nih cun a langhter.
Ralhraang lei in minung 12 nak tlawm lo hi hliam an tuar lai tiah zumh a si i, hliam a tuarmi le aa khongmi hi abik in bomb hmanmi/tunhmi nih a puahhnawhnak hna in a si bik tiah a langhter chih. Kahdohnak ah CDF lei in aa hliammi a hohmanh an um lo tiah CDF-Mindat nih fehternak a tuah tiah Chindwin nih a langhter.
Ralhraang Gas le Petrol phurmi Mawtaw ngan (ke-12) ngei cu a ho ti theih lo phu nih an kah. Gas le Petrol a phurmi Mawtaw, Ke-12 ngei cu a ho ti theihlo phu nih an kah i an hrawh dih cikcek tiah ralhraang lei nih cathanh an chuah. Hi gas le petrol a phurmi mawtaw ngan hi Myitta in Dawei tiang a kalmi a si.
Nizaan April 1 ah hi thil hi a can a si i, kah a tonnak hmun hi Dawei-Myitta-Htee Khi lam ah a si tiah ralhraang lei nih cun an langhter. Cun hi mawtaw ngan ke-12 ngei hi Kase Do Htoo company nih an ngeihmi a si tiah an langhter chih, hi mawtaw nih hin gas le petrol hna cu Myitta in Dawei tiang a phurh tawn tiah theih a si.
Hi kahnak a ton hi hriamnam a tlaimi minung 20 hrawng in a si tiah an chim, metre zakhat hrawng aa hlatnak in mawtaw ngan hi an kah tiah an chim. Mawtaw mawng pahnih zong an kah le cangka an zaam colh tiah theih a si. Dawei siseh a pawngkam um hriamtlai nih tutiang mawtaw kahnak thawng zeihmanh an thanh rih lo tiah theih a si.
