Related Articles
Pakokku Myonay, Myit Phya khua ah ralhraang nih an luhhnawh hna i inn 86 mei in an khanghpiak hna pin ah mipi lei minung 4 an kah hna tiah thawng kan theih. April 8 ah Pakokku Myonay, Myit Phya khua ah ralhraang nih an luhhnawh hna i mipi umnak inn 86 mei in an khangh piak hna pin ah minung 4 an kah hna tiah thawng kan theih.
Ralhraang pawl hi minung 80 hrawng an si, kum 26 a simi Ko Kyaw Sua U telh in a dang minung 3 zong an kahchih hna. A dang pa 3 hi an min fiang in kan thei rih hna lo. Kum 13 lawng a si rihmi hngakchia pakhat zong meithal kuan nih a kheen i a zual ngai tiah khua mi pakhat nih a chim. Ralhraang pawl cu April 8 chun suimilam 3:00 PM hrawng ah khan khuachung ah meithal he an rak lut i mipi inn pawl zong a kan khangh piak, a kan hrawhpiak dih. Myit Phya khua hi inn 430 an um minung an dih lak ah 2000 leeng a um mi khua a si.
Ralhraang pawl an rak luh in an dih lak tein an tli dih. Ralhraang pawl cu tuzing kaa lawngah khan khua an chuah taak i khua mi pawl zong mah ralhraang pawl an chuah hnu lawng in an khua ah an lut tthan i mah an luh lio ah ruak cu an hmuh pah mi cu a si tiah khuami pakhat nih a chim. Ralhraang pawl hi minung 80 hrawng an si i kan khua an luh hlan ah a dang khua pawl zong an luh i an kah hna dih in an khua ah an rak luhmi hi tiah Khit Thit nih a langhter.
