Related Articles
UN Nan Hrawh Ṭung Lo Ahcun Russia Hi Zohsawh Ti Hlah Uh: Zelensky Ukraine President Zelensky nih cun, “Vawlei ralpi pahnihnak hnu ah a chiahru bik mi thahnawnnak cu Russia ralkap nih an tuah i, Ukraine mipi an thahnawn hna.
Hi thahnawnnak ah hin raltuknak tank an hman i lentecelhnak men bantuk ah Ukraine mipi cu an ruah i an thahnawn hna,” tiah UN National Security Council ah video file in a chim. “Russia ralkap tuahsetnak nan hmuh ko nain UN nih action nan la ngam taktak lo. UN hi hrawh maw nan i timh? International phung vialte cu a nung ti kun lo maw? Cuti a si ṭung lo ahcun Russia hi nan zoh sawh awk a si ti lo i nan phetchem awk a si ti lo,” tiah Ukraine President Zelensky nih cun a chim.
President Zelensky nih cun UN Security Council ah VETO Power in mithahnak license a ngei mi ram pakhat he kan i tuk khan a si, tiah a chim pinah Bucha khua ah Ukraine minung a zaleng in an thah mi hna hmanthlak le video zong UN National Security ah a hmuhsak hna.
SAC Ralkap Nih Kani Peng, Lapuh Khua An Khangh: Sagaing ramthen , Kani peng Lapuh khua cu SAC ralkap nih April 2 ah an luh hnawh i mipi thilri pawl le inn zuat satil arva zong an chuh hna i minung umnak thlam 10 an khangh piak hna. Cun khuami pakhat cu an an tlaih i an tuk velh tiah Kani People’s Defense Force (KPDF 2) sin in theih a si.
SAC ralkap pawl cu March 31 ah Kani peng Lapuh khua an rak phan i April 1 ah meng tung 64 ah zaan an riak, April 2 ah Monywa-Yagyi-Kalaywa lam Kani khua pawng ah ummi minung umnak thlam 10 an khangh i ralzaam pakhat an tlaih i sakhan ah an kal pi tiah theih a si. SAC ralkap nih cun chun Sml 12 hrawng ah Lapuh khua an luh hnawh i inn 15 an boh i an duhmi paoh an i lak i a dang a taang mi cu an hrawh dih. Vok zong an kah i an ei a dang pakhat zong an motor ah an i khin i an i kal pi tiah theih a si.
SAC ralkap nih khua an chuah tak hlan ah ralzaam an tlaih ta i mipi thil an fir mi cu an sakhan ah an kuat hna. Chunhnu Sml 1:30 hrawng ah an sakhan cun an chuak i meng tung 66 ah phak ah hriamngan in khuami cu an tlerh hna tiah theih a si. Credit: The Chin Post
