Related Articles
Ngaihchiatnak thawngpang: Thantlang in Lawngtlai ah ralzaam a simi Pu Al Cung, kum 90, nih Lawngtlai siizung ah mual a kan liam taak tiah theih a si. Pu Al Cung hi TBC Khrihfabu le Thantlang khuanu khuapa nih cun bochan ngaingaimi a si.
Thlalang Cazual tibantuk zongah Lai Nunphung kong a ttial lengmangtu kan pa pakhat a si. TBC Khrihfabu chungtel dihlak zong nih nan ngaihchiatnak kan i hrawm ve tiah an langhter. Nihin April 28, 2022 ah khan Lawngtlai siizung ah a kan liam taak hi a si. TBYD Thlalang Cazual zong ah tihin an langhter “Ngaihchiatpinak, Kan Khrihfabu chung in Biakinn sang ummi. Pu Al Cung (Kum 90) nih 2022 Vaupi 28 ah, Lawngtlai siizung ah mual a kan liamtak. Amah hi Thlalang Cazual ah Lai Nunphung kong a ttial lengmangtu kan pa a si. Hmunkip kaakip ummi a tufale vialte hna, TBC Khrihfabu chungtel dihlak nih kan in ngaihchiatpi hna. Bawipa Thlarau nih in hnem hna seh. Hi vawlei ah hin kannih caah zungzal hmun ding khua a um lo, a ra laimi khua tu kha kan cuan. Hebru 13:14” ti’n an langhter ning cu a si.
Russia Nih Poland Sin I Gas A Pek Tawn Mi Cu A Donghter Cang! Russia nih Yamal minthutnak phunglam in Poland sin ah gas a pek tawn mi cu nizan April 27 khan a donghter cang, tiah European Union Network of Gas Transmission operator data nih a langhter. Ukraine cung i a cawlcanghnak ruangah nithlaklei ram hna he i theihthiam lonak an ngeih mi cu a karh deuh lai, tiah zumh a si.
Poland bantuk ṭhiam in EU le NATO member a si mi Bulgaria zong Russia nih Gas ka phihkhar lai, tiah a thanh rih. Ukraine nih cun Russia cu Europe ram hna he rianṭuanṭinak a hrawktu ah a puh i, Europe ram cu Gas le Oil phihkharnak in hrem timh ah a puh. President Zelenskyy nih cun, “Russia nih an i timh bik mi cu Ukraine ram laak lawng siloin Europe ram hna le nichuahlei ram hna laak a si i, democracy uknak hrawh dih zong aa timh bik mi a si,” tiah a chim.
Poland le Russia cu gas kongkau ah hnatlaknak an rak tuah i, kumkhat ah cubic meter 10.2 billion Poland sinah supply ding in minthutnak an rak ngei. Russia in a cawk mi gas hi Poland nih a herh mi 50% a si. Roland tang i gas lei tlaitu PGNiG nih cun Russia nih Belarus le Ukraine ramchung in gas a pek tawn mi cu nizan zing suimilam 8 hrawng ah khan an phih cang, tiah an thanh. Sinain Poland nih cun gas khon cia mi tampi an ngei rih i, gas khawmnak(storage) ah 76% hrawng a um rih, tiah an thanh. Russia president Vladimir Putin nih cun, Russia sin i gas a cawtu hna nih Russia phaisa Rouble lawng in cawk khawh a si lai, tiah a rak thanh. Cu phungphai cu ram tlawmpalte lawng nih an zulh khawh, tiah theih a si.
