Related Articles
Hriamnam cawknak ding phaisa vialte a rak ei dihtu siangngakchia tlangval pakhat cu University pakhat nih ca cawng kho ti lo dingin a min an phih piak. SAC ralhraang doh dingin hriamnam cawknak dingah ti’n phaisa a rak lutmi pawl cu a thli in a rak hman tikah Technological University, Panglong i siangngakchia pakhat cu a chan chung sianginn kai kho ti lo dingin a hawikawm siangngakchia hna nih a min an phih piak.
Siangngakchia Sai Htin Aung @Linn Htin nih cun Dictatorship Revolutionary People’s Army (DRPA) caah hriamnam cawknak dingah ti’n phaisa a rak lutmi ting 120 cu dik/hmaan lo ning in a rak hman. A sin ah hin kum 2021, November thla ah khan phaisa pawl kuat dih a si i a ni an khiahmi ah phaisa cu a ap kho ti hna lo cu caah thla hnih caan an pek tthan. Cu hnu ahcun amah lila zong hmuh awk a um ti lo i pehtlaih khawh zong a si ti lo tiah an chim. Cu ti a si ruangah Dictatorship Revolutionary People’s Army (DRPA) nih cun Panglong Technological University siangngakchia hna sin ah bawmhnak an hal phahnak hi a si.
NUG siseh, Panglong Technological University i Interim University Council zong nih Sai Htin Aung cu March 4 ah khan voikhat, March 30 ah khan voikhat an auh i a sining i chim fiang dingin caan khiahpiak a si nain a rak lang duh ti lo tiah an chim. Cu ruangah dothlennak ding caah hmuhmi phaisa cu dik lo ning in a hmangtu Sai Htin Aung @Linn Htin cu Interim University Council i central committee cathanh bantukin a min cu phiatter (hloh) a si i sianginn in phuah a si cang tiah theih a si.
