Related Articles
Nihin May 15 Thawngpang: SAC ralhrang motor 68 cu Ceuh Htuh lei ttum kho lo in hmai kal motor pawl lawng an kalter hna, CDF phufonh nih lam pi ah bomb (mine) an puahhnawh hna tikah tam tuk an thi tiah theih a si. Mindat Ralkap sakhaan 274 zong ah hriamnam ngan miakpi 120 MM le kuanpehtlai (machine gun) meithal pawl zong timhcia tein an chiah dih kha hmuh a si.
Chin state, Mindat peng, mindat-Ceuh htuh lam ah SAC ralhrang an hmai kal pawl le CDF phufonh hna tu ni May 15 zaanlei suimilam 3:00 pm hrawng in kahdohnak a chuak. Matupi in a rak ttum mi SAC ralhrang motor thluan cu May 13 khan Mindat khua ah an phaan i tu zingka ah Magwe peng ceuh htuh lei ah an i thawh tthan i lam pi ah a tubantuk in kahdohnak a chuah hi si tiah Zalen nih a langhter.
Falam Pengchung Ah Bomb hliamhnak in SAC Ralkap 12 An Thi, Tiah CNO/ CNDF Nih An Thanh: Chin ramkulh Falam pengchung bomb puahnak in hliam a tuar mi SAC ralkap 12 an thi i, minung 15 hrawng nih hliam an tuar, tiah CNDF nih May 14 ah an thanh. Tank 2 le SAC ralkap motor run 26 cu May 9 ah Falam in Kalaymyo lei ah an kal i, mengtung 63 ah an i din. Lamkam hmunhma zohfelnak le thianhhlimhnak an tuah lio ah bomb puah an tong i, SAC ralkap zeimawzat an an thi. An ruak cu Falam peng Parte khua innchung ah an chiah hna i, an khangh hna, tiah an langhter.
SAC ralkap hna cu mengtung 55 hmunhma hrawng ah bomb puahhnawh an ton ṭhan caah a thi mi le hliam tuar mi an um rih, tiah an cathanh ah an langhter chih. Mengtung 45 hrawng an phak ah CNDF nih pa-de-ta bomb puahhnawh in an doh ṭhan hna caah SAC ralkap 4 an thi i, hliamhma pu zong an um. Mi ruak hna cu Zawnglay khua ah an khangh hna, tiah CNDF nih an thanh.
CNDF nih mengtung 63 le mengtung 45 kar hmunhma zohfelnak an tuah lio ah SAC ralkap nih an kaltak mi MA kuan 120, 60 mm pakhat, kuanbawm pakhat an laak i, nu thilri zong hmuh a si caah nu ralkap zong an i tel lai, tiah ruah a si ti in CNDF nih an langhter chih. SAC ralkap nih Falam peng Ramthlo khua inn 10, Tlangzar khua inn 17, Parte khua inn 7, Zawnglay khua inn 5 tiin, inn 39 cu nai hrawng ah an khangh cang. May 15, tiang a hnu bik thawng kan theih ning ah SAC ralkap hna cu Taingen khua an phan cang, tiah CNO/CNDF nih an thanh.
