Related Articles
US ram, ram ttha kan timi zong hi pakhat le pakhat i kahthahnak thawngpang a tam ngai, nizaan May 25 2022 zongah pa pakhat nih meithal i ken in ngakchia sianginn ah sualnak ngeilo ngakchia minung 18 le upa minung 3 a kahthah hna tiah thawng theih a si.
Hi i kahthahnak a chuahnak hi Robb Elementary School, Uvalde, Texas ah a um mi a si i sualnak ngeilo a thi mi ngakchia hi minung 18 an si i upa minung 3 an si tiah Texas state Senator Roland Gutierrez nih cun zapi theih dingah chimphuannak a ngeih hi a si. Texas Governor Greg Abbot nih a chim ning ahcun hi meithal aa tlaihmi pa misual pa hi Salvador Ramos tiah theih a si.
Ngakchia sianginn chung a luh ah hin a kut ah meithal aa tlaih, rifle phun si dawh a si, cu tlawmpal ahcun ttihnung taktak in a kah thluahmah colh ko hna i ngakchia minung 14 an thih pin ah siangcachim zong a thi mi an um tiah a chim. Hi a chim lio ah hin ngakchia a thi mi hi minung 14 lawng a si rih, a tu ahcun 18 ah a kai cang. Mr Abbot nih cun misual pa zong a hmun lila ah palek officer te nih an kahthah colh ve tiah a chim.
Hibantuk in mipi kahthah hi a tam ngai cang, nai tan zongah misual meithal aa tlaihmi pa pakhat nih Buffalo, New York, ah minak 10, thil a caw lio mi le rian a ttuan lio mi cu kahthah an rak si. Cun kum 2019 lio ah, El Psao i Walmart ah misual pakhat nih minung 23 a rak kahthah tthan hna. US hi hibantuk thawngpang theih ding a tam ngaingai kan mah Chin miphun zong biatak tein kan i ralrin a herh, a zalong mi ram a si tikah duh paoh in hriam i tlaih khawh a si i nunnak caah ttihnung a si cang.
