Related Articles
Tubantuk in kan rak langhtermi hi cmpage (Facebook) nih nizaan tihni May 5 ah kan pasalttha hna nih ram le miphun caah ti’n an nunnak an peknak konghe pehtlai in Europe ram um Lai miphun nih tthutpinak an tuah. Cu ah cun kan pa Dr Lian Hmung Sakhong zong aa tel ve, biahalnak tete zong an tuah, cu biahalnak chungin a lehmi hna cu tubantuk ah kan rak langhtermi a si.
Biahalnak tampi an tuahmi lak ah, CDF le CNF/A hi an lung aa rual maw aa rual lo, timi biahalnak a lehmi hna hi a si, a timi CDF le CNF/A cu chim hlah tutan dothlennak ah Lai (Chin) miphun kan lung aa rual hi a um bal lo tiah a chim. “CDF le CNF nan lung aa rual lo nan timi hi a dikmi si lo kan lung aa rual tuk, kan i rem tuk. Kan tuanbia ah tubantuk rualremnak hi a um bal lo, a chung i rian a ttuanmi taktak khi zoh hna uh, a leeng (facebook) tibantuk i a au sawhsawhmi khi cu vuipi a kal lio i a pawngkam uico an boh bantuk khi si, uico an boh kha zoh hlah vuipi tu kha khoika dah a kal lai timi tu zoh deuh” tiah a chim.
A peh rihmi cu CDF (Chinland Defence Force) phu hleiruk (16) hi CNF camp ah kan um, CNF camp ah va kal ulaw Hakha nan hmuh bal lomi kha nan hmuh lai. Cucu inn kan sak i CDF-Thantlang, CDF-Hakha, CDF-Falam tibantuk in kan tling dih, zung (Office) tete zong an ngei hna tiah a ti. “Hmunkhat te ah khua kan sa tti, khua kan khang i lai kan rel tti, rualrem tein kan um hna. Kan khua le kan ram hi zeitindah kan zohkhenh ning le zeitindah kan humhimh ning a si lai timi tiang khi hmunkhat teah kan zoh tti. A hlan in a tutiang ah tubantuk rualremnak hi a um bal lo, a tubantuk in rian kan ttuan tti bal lo cu caah cun biavaivuan kha ngai hlah uh, kan rian ttuannak kha rak zoh uh. Lungrual tein um hlah usihlaw kan nih hriamnam tling a ngei lomi nih zeitindah hi raal hi kan dir ngamh khawh lai” tiah a chim.
Hi kong a chim ah hin Dr Lian Hmung Sakhong zong a bia a faak ngai, mipi kan ruahning hna le a chung rianttuan ning aa dan zia kha a langhter, bia sawhsawh le biavaivuan hi zum hlah uh, a chung rianttuannak tu hi biatak tein zoh ko uh timi zong faak ngai in a langhter. Kawl ralkap i timh ning ahcun zarkhat fai ah Victoria Camp tham cu kan laak lai an timi kong zongah Dr Lian Hmun Sakhong nih bia pehpar ah a chimchap “An nih (Kawl ralhraang) an i timh ning ahcun ralkap 300/400 hrawng kan thlah hna ahcun CNF Camp hi cu zarh hnih ah kan laak lai an ti, a tu kan zoh tikah ralkap 500 renglo siseh mawtaw 100 renglo he an kan fuh nain nihin ni tiang an laa kho lo, kan lung aa rual ruangah si lo maw, kan lung aa khah ruangah si lo maw, kan dir tti ruangah si lo maw, kan tuk tti ruangah si lo maw. Nihin an i tuknak zong kha zoh tuah uh Falam peng chung ah a si, a thi mi kha zoh hna uh Thantlang peng, Hakha peng, Zotung, Zophei, an i tel dih.
Kanmah Chin ramchung lawng hmanh si lo, Sagaing le Magwe tibantuk zongah kan fale 200 an i tel khah. Cu caah cun kan lung aa rual lo timi hi nan thinlung chung hrimhrim ah chia hlah uh, cubantuk lungput nan ngeih ahcun lungruallonak lei ah nan kal ko lai. Tubantuk in kan lung aa rualnak hi miphun phunkhat kan si thi khat sa khat kan si timi nih bia a chim caah a si. Pathian nih lam a kan hruai caah a si. Kum 70 chung Kawl ralhraang nih Chin miphun an kan tthennak in nihin ni ah hiti bantuk kan i fumtom khawh hi Pathian rianttuannak a si, kan lung aa rual tuk ti kha nan/kan lungchung ah chia peng usih.”
Cun Facebook ah miphun kong i a phunzai tukmi le thinhun tuk ruangah phunzai a hmangmi hna sin ah biacahnak zong a ngeih chih, nan zainak le duh paoh in ca nan ttialnak nih lungrual lo nak a chuahpi ti thei uh tiah a ti “Facebook chungah kan lung aa ruallonak kong, sivanghnak kong, aipuannak kong te hna hi chim lengmang hlah uh. Hibantuk caan i lungruallonak caa kan ttialnak nih khan mipi tamtuk ah thachiatnak a chuahter. Biachim holh rel rak i ralring uh” tiah a chim.
Nizaan tihni May 5 ah kan pasalttha minung pakua an thihnak kong ah a biachimmi zong uar a um ngaingai, a chim mi cu “Raal lak ahcun tam deuh kan thih caan um lai tlawm deuh kan thih caan um lai, bomb pakhat a puah lio ah minung tampi a thah khawh ti cu nan theih ko cu ta, hmunkhat kan kalnak ah bomb pakhat nih rak kan tlak sehlaw a za za a sawm sawm in kan thi ko lai. Pathian nih a kan umpi i Kawl ralhraang kan thahmi hna hi thongkhat leeng an si cang, kan nih cu Pathian nih a kan zohkhenh i a paam mi zakhat kan tling hraw lo. Voikhat i kan fale tamtuk an thih ruangah thazaang der hlah usih, tubantuk thihnak kan tonmi nih hin hmailei ah zeitindah thazaang kan laak lai timi ruat hna usih. Cu caah cun biavaivuan chimnak le thazaang dernak ah i laak hlah uh, thla tu cam ko hna usih” tiah a chim.
Tutan a chimmi hi a cunglei ah kan langhter cang bantuk in cmpage (facebook) nih tuahmi ngaihchiat tthutpinak le biaruahnak ah a chim mi a si, a chim mi tampi lakah a tawinak in kan rak langhtermi a si, cmpage ah tlamtling tein ngaih khawh le zoh khawh zong a si. Tubantuk dothlennak ah pumpak pakhat cio kan biapi, kan biachim holhrel ah siseh kan cawlcangh ah siseh kan i ralrin taktak kha biapi tuk hringhran. Cun Pathian sin thlacam hi kan daithlan lo zong a herh. Note: A ngeitu nawl loin copy tuah hram hlah tiah kan in nawl.
