Related Articles
Ka Pute Ngun San Aung, Chungkhar kan ningzahnak kong Cakuat in kan theih ter. Ka pute Ngun San Aung, na chungkhar kan ningzahnak kong na tupa nih cakuat in kan theihter. Chin ram mipi an kan that tu, sualnak ngei lo Chin minung le ngakchia hramhram in a tlai hna i a that tu hna a simi le Chin ram kan innle lo a khaang dih tu hna SAC ralhraang na dirkamhnak hi kumkhat cu a hun tling ve ko cang.
SAC ralhraang nih Chin ram zohkhenhtu ding timi rian an i pek lio ah chungkhar lei nih kan duhlonak kan rak i chimh cio. Chungkhar meeting kan tuah hna i hmunkip in kan i chawn hna, Chin ram le Chin mipi hmai kan khap lai lo e, hmailei dirhmun zong zoh pah rih ko law a tu rumro ahcun SAC sawmnak le fialnak hi cohlang duh hlah rak ti cio na si. A sinain chungkhar le hawikom bia zei ah na rel lo i “Keimah nawl a si ko, nan duh le ka hlaw uh ti tluk tiang in na hmuarka in bia a rak chuak. Na pumpak nawlngeihnak kha kan i hnorsuang ngam lo i faktuk in kan i el ngam lo ticu nangmah zong nih na theih ko lai.
Cun a tu ah zoh tuah, Matupi sualnak ngei lo minung zeizat dah an thih cang. Matupi khuapi le a pawngkam khua zeizat dah kan zaam cang i kan innle lo zeizat riamruam dah a kaang dih cang. Thantlang khuapi a ning in a khangh khi na hmuh ko i kan Chin minung hawi thah an si cuahmah mi na hmuh ko bu ah nangmah cu SAC ralhraang cabuai ah uico fate bantuk in an hnu na zulh hna i na tthudir peng rih ko. Nangmah cu leng ah na chuak lo, Chin mipi hmai ah na langh ngam ti lo caah zeitluk in dah na chungkhar, na tufa le kan ningzah ti hmanh a ruah awk na hngal ti rua lo hi ta. Ka Pute Ngun San Aung, kan nih na tufa le na chungkhar naihniam cheukhat cu Chin mipi hmai hmanh ah pei kan chuah ngam ti lai lo hi.
Chin mipi thisen vialte na kut ah aa neh dih mi nih kan mah zong an kan cemh ve sual ko cang lai hi ta. Kan nun bu in nan kan thah dih ko cang, na chungkhar cu kan nung nain mipi thinlung ah kan thi dih ve cang. A caan ahcun keimah te in i thah lawlaw hmanh hi ka lung a chuak cang. Zeitin dah sahraang ah nai ser khawh i sahraang nunnak chung ah sahring ei in na um ve khawh ko. Fak pi in khuaruat law, a tu lio caan ah SAC ralhraang na zaam tak ahcun Belnang nan kan thuhmi vialte na hawh tthan dih lawng si loin, Chin mipi nih an i lawmh tuk lai i SAC ralhraang taang nak in na chan a sau deuh lai. Zaangfah tein na chungkhar zawn le na tufa le kan zawn kan ruat hram ko tiah kan nawl ko. Note: Hi cabia hi VOM Journal page in laak chinmi a si, Credit zong anmah kan pek hna.
