Related Articles
Matupi in Mindat lei ah a kalmi Kawl ralhraang pawl hi rithaisii a tawngmi lawngte an si tiah theih a si. CDF-Matupi le CDF-Mindat zong nih an mawtaw tamlak an rak laak khawh tan zongah rithaisii ceilak kan hmuh tiah an rak chim bal.
Hi kong he pehtlai in Matupi in Mindat lei a fuhmi Kawl ralhraang nih hin rithaisii an tawng tiah CDF-Mindat lei nih Mizzima ah an rak chim hi a si. “Hi Kawl ralhraang nih hin rithaisii an tawng ngaingai tiah kan theih. Hi tluk in an hawile tamtuk an thih cuahmah bu ko zongah an nii kho peng rih. An hmai i an hawile thimi ruak an hmuh ko zongah kan nii thluahmah ko tiah kan theih. Hriamnam ngan an kahsual can zongah zeihmanh ruat lem loin an nii salam ko” tiah CDF-Mindat ttuanvo ngeitu pakhat nih cun a chim hi a si. Mindat khuachung ikahdoh lio caan zongah Kawl ralhraang pakhat a thi i, a thisen cu uico nih a liah cu zong ahcun cu uico tthawl le dawi zong an ngei lo zoh sawhsawh in an zoh ko tiah an chimchap.
A hmasabik Mindat khuachung kahdohnak a rak chuah lio caan zongah khan CDF-Mindat nih ralhraang mawtaw ah rithaisii tam taktak an rak tlaih. April 27 thoik in Matupi-Mindat lei a kalmi ralhraang tank pahnih le Mawtaw 73 cu CDF-Matupi le CDF-Mindat nih an rak kah hna i ralhraang minung 84 an thi, hliamhma tuar zong ceilak an um tiah theih a si.
