Related Articles
Thawngttha taktak a si, Demoso-People Defence Force, Battalion-1 nih sniper a ttha taktak an cawkmi hmanthlak cu an rak tarlangh cang. Hi sniper hi ruger precision rifle 338 sniper an ti i vawleicung sniper vialte lak i a ttha pawl ah aa tel vemi a si. An cawkmi sniper hmantlak cu nihin May 24 2022 ah an rak langhter hi a si.
Hi sniper ttha taktak an cawk khawhmi hi mipi nih an thawhmi phaisa in a si tiah an langhter chih. Demoso hi kahdohnak zong a tamnak hmun pakhat a si tikah mipi zong an lung aa rual ngaingai timi a lang, Hi sniper man zat hi Kyats in 3.6 million tluk bak a si i a kuanfang (bullet) hi Kyats 55,000 tiang bak a si tiah Chindwin nih cun a langhter. Kuanfang man hi a fah tuk caah DMO-PDF nih hin fund (fan) kawl tthan dingin mipi sin ah timhtuahnak an ngei tthan timi zong langhter chih a si.
Demoso-People Defence Force hi Kayah state i um mi Karenni phu chung nih dirhmi a si i Kawl ralhraang nih nawlngeihnak an laak hnu in nihin ni tiang biatak thlak in Kawl ralhraang he aa kapmi an si tiah Chindwin zong nih a langhter.
