Related Articles
Kan theih cio bantukin tuzing cu kan i ngaih cio mi le kan i hngahhlangmi Uefa Champions League final pi cu a si ko cang, a lungfaakmi tampi an/kan um lio ah a rak i lawm taktakmi an/kan rak um ve hoi. Tuzing Real Madrid le Liverpool cu zoh an dawh ngaingai, i tei lak ah a faak khunmi 1:0 in Real Madrid nih teinak an hmuh tthan.
Tuzing final cu nan zoh cio ttheu ko lai i Liverpool nih an hneh deuh hna in a lang, Stats zong zoh tikah an hneh deuh hrimhrim hna nain Real Madrid zong an tactic maw si lai an vantthat bia dek a si hnga, hi ti ka chim tikah a pom lomi zong tampi kan um ttheu lai, teinak cu an hmu tthiamtthiam hoi ko. Tuzing an i celh ning statistics zoh hna usih, Minutes 90 an chuih chungah Liverpool nih hin goal 24 an shoot i target ah 9 a lut, Real Madrid belte caan dihlak chungah voi 4 te lawng shots an ngei i target ah hin 2 te lawng a si rih, aa thlau taktak khi an si.
Hmanhsehlaw target voi 2 chungah goal 1 a lut i cu nih cun teinak a peek hna. An possession belte hi cu aa thlau tuk lo Liverpool hi 54% in an saang deuh i Real hi 46% in an niam deuh. An i celhmi caan dihlak chungah Liverpool nih passing hi 591 an tuahkhawh, Real nih 513 an tuahkhawh ve cu tluk piin aa thlau cu an si lo. Minute 90 an i celh i fouls belte ah Liverpool a tam deuh 13 fouls an ngei i yellow card voikhat an ngah, Real belte fouls 7 lawng an ngei i tutan cu red card chim hlah yellow card pakhat hmanh ngah loin teinak an hmu. Corner zong an i thlau ngaingai Real nih 2 corner an ngeihmi ah Liverpool cu 6 tiangte an ngei. Hmanhsehlaw statistics hi teinak a um lo cun san a tlai lem lo. Vinicious thawng in Real Madrid nih teinak cu an laak tthiamtthiam.
Cun Real Madrid hi kum 2014 thok in tutan Champions League final hi an voi 5 final an kainak a si lai. Kum 1998 thok in nihin ni tiangah voi 7 Champion dirhmun ah an phaan, Real hi UCL ah Champion dirhmun in voi 14th tiang a dir kho mi an si anmah bantuk club an um rih lo, Kum 2018 ah Liverpool he final an kai i Real nih 3-1 in Kyiv khuapi ah teinak hraipi an rak cawi. Real Madrid hi kum 2016-2018 karlak kha a peh in voithum tiang Champion an si cucu Zinedine Zidane nih a rak tlaih lio tan ah khan a si, Kum 2014 i an voi 10th Champion tan ah khan a tu an coach a simi Carlo Ancelotti nih hin a rak tlaih.
Real hi tutan Knock-out ah one leg hi cu an sung dih, cucu Paris St Germain, Chelsea le Manchester City ah hin a si hmanhsehlaw an i zuamnak nih final tiang a hruai tthan hna, cu zong cu goal khat tete in total ah teinak an hmu. Real le Liverpool hi kum 1981 lio ah khan 1-0 in Paris ah Liverpool nih an rak tei bal hna, a cunglei kan rak langhter cang bantuk in 2018, Kyiv khuapi ah Real Madrid nih 3:1 in an rak tei ve hna i tutan zong Real Madrid nih Paris tthiamtthiam 1:0 in an tei tthan hna hi a si i, Champions League hraipi cawi tambik dirhmun tiang an phaak zong a si.
