Related Articles
Kanpetlet peng ralzaam camp ah hngakcia 7 hrawng an thi, eidin, thilrii, ruahkhamnak le thil lum a herh tuk: Chin ramkulh, Kanpetlet peng chungah a ummi Darrendu ralzaam camp ah ralzaam hngakchia 7 hrawng an thi i sii, eidin, ruahkhamnak le thil lum hna an rannak in an herh tiah ralzaam pakhat nih Chin World ah a chim.
“Kan ummnak camp ah kahdohnak aa thok ka tein ruahkhamnak kan hman caah a caan rauh cun a a khang ti lo. Cun, Fur a tlak cang caah ruahkhamnak pawl thlen an hau cang. Kan umnak hmun hi a kih tuk caah upa nih cun kan in khawh ko nain hngakchia nih an celh lo caah an zaw lengmang, an khuh lengmang caah thil lum le sii an herh ko” tiah Htankone ralzaam camp in rianngeitu nih Chin World ah a chim.
Darren Du ralzaam camp ah Kanpetlet khuapi chung in a rak zaammi le Cinduai in a rak zaammi 300 leng an si i nau a pawi liomi 25 le hnukding lio hngakchia 70 an um caah ralzaam hna nih eidin an chanbau tuk tiah a chim. “Kan camp chungah khuapi zaamtak in a raami an tam cun khuapi ah kir ṭhan awk a ṭha ti lomi dirhmun an si caah facang, chiti, cite pawl an herh tuk. Atulio caan ah bawmhnak hal a har tuk lio caan a si caah harnak kan tong ngaingai” tiah a chim.
Kanpetlet peng kahdohnak ruangah khuami a thong leng an zaam i cu chungah sii lei chanbau ruangah nau aa rawk i a thimi le hnukding lio hngakchia 7 an thi cang tiah Chin World sin in theih a si. Credit: TCP
