Related Articles
EU nih Russia Zinaan Tam u a Kham – Donbas Dirhmun a Chiakha Ngai: Ram 27 an i fonhnak EU nih Russia zinaan tam u kham dingin Monday ah khan hnatlaknak an ngei. Ukraine nih a nehnungbik i an kilven cuahmah lio mi Luhansk pengkulh um Sievierodonetsk ah i tuknak a zualhma ngaingai ti asi. A liamcia thla 3 lio tein Russia nih Ukraine a luhhnawh ruangah a cungah EU nih phihkharnak faak taktak in an tuah. Tutan i Russia zinaan tam u kham dingin hnatlaknak an ngeihmi nih hin cheuthum ah cheuhnih tluk an khampiak lai, tiah theih a si.
Hi ti a zinaan kan kham nak thawngin Ukraine i ral a tukmi a thazaang hi tampi kan zorter khawh deuh te lai, tiah European Council President Charles Michel nih a chim. Kum dongh lei sang in cun Russia zinaan kan cawkmi vialte chungin 90% hrawng kan thumh cang lai. Asinain Hungary belte cu Russia zinaan rinh in khua a sa mi a si rih caah, anih cu ai tel lai lo. Cun phihkharnak tuah ruangah an ram chawlehnak hnursuan a tong dingmi ram zong telh an si ve lai lo, tiin EU hruaitu nih an chim. Russia bank nganbik Sberbank zong SWIFT system chungin chuah dingin EU hruaitu an hna a tla i, Russia state TV 3 zong kham chap dingin biachahnak an tuah, tiah theih a si.
Russia nih Donbas pengkulh faaktuk in a kah, ti thawng an theih le cangka a tu bantukin EU hruaitu pawl nih lungtlinnak an tuah hi a si. Donbas dirhmun cu a chia ngaingai ko, tiin President Zelenskiy nih a chim. Luhansk le Donetsk khua an umnak Donbas pengkulh a ningpiin laak hi Russia nih ai tinh pengmi a si. Hi pengkulh hi Russia tanhtu Ukraine mipi an umnak hmunhma a si, tiin Moscow nih a chim. Siverskyi Donets tiva hrawn ah a um Sievierodoenetsk le Lysychansk khua unau Russia nih a lak khawh a si ah cun, Luhansk hi a ningpiin a uk khawh cang lai i, thla 3 lenglo ral an tuk hnu ah teinak buan a thar in a co bantuk ah an cang lai, tinak a si lai.
Asinain, khuapi hmete pakhat ah Russia nih a thazaang a bungh a si ah cun, kadang ah a thazaang a der ngai ve lai, tinak a si. Kan Ukraine ralkap nih Andriyivka, Lozove le Bilohorka lei tiang Russia ralkap pawl an dawi khawh hna. Hi khua hna hi Inhulets River kap ah a ummi khua an si i, Russia nih lak an i timhmi Kherson pengkulh he ai ramri mi an si. Lamhla kahnak hriamnaam kan herh ko, tiin Ukraine nih Western ram sin ah bomhnak a hal ko nain, Russia riam a kap phan khomi rocket system cu kan in kua kho hna lai lo, tiah US President Biden nih a chim. Cu ti Biden biachimmi cu ‘a dawhcahtukmi bia a si” tiin Russian Security Council Deputy Chairman Dmitry Medvedev nih a ti.
Russia nih Bomb in a Kah hna, Monday ah khan Kharkiv le Sumy ramri cu Russia nih an ram in a langin bomb in an kah hna, tiah Zelensky nih a chim. Sievierodonetsk ah cun Russia bomb ruangah ai rawkmi inn le lo a tlawn deuh ngai cang. Asinain, Donbas pengkulh tluanchuak i Russia kahdohnak belte Ukraine nih duh ningin a dironh kho thitha lo ah a cang. Sievierodonetsk in southeastern le northeastern lei ah Russia ralkap hma an sawt ngaingai. Asinain, Toshkivka in chaklei pi tiang Ukraine ralkap nih an dawi/nawr khawh than cang hna i, khua kulh kho lo dingin an tuah hnga, tiah Luhansk governor Serhiy Gaidai nih a chim.
“Russia hi cuhlan an i hmanmi tactics theu ai hman peng ko rih. Suimilam saupi chung bomb in an kan kah hmasa ta – nazi 3, 4, 5 chung pehtlai in an kan kah – cu hnu cun ralkap thazaang hmangin an kan kah. Kee in a kan dotu paoh an thi. Cu in cun bomb thlak an thok than, cu khawh in cun kee ralkap he an kan luhhnawh than. Phak an duhnak hmun an phaak hlan lo cu ticun an kan doh peng, Khua a lin chinchin cang i, Sievierodonetsk khua a kihriang hrawng cu mithi rim le thla in a khat” tiin Gaidai nih a chim. “Sievierodonetsk i cheuthum ah cheukhat tluk cu kanmah kut tang a phan cang,” tiin Russia a tanhtu Luhansk People’s Republic an hruaitu Leonid Pasechnik nih Tass news agency ah a chim.
Monday ah khan Russia nih Sievierodonetsk khua cu bomb in an kah i, Frederic Leclerc-Imhoff tv channel BFM ah a tuan lio mi French thawnglatu pakhat an thah. Mipi thialkaamnak rian an kalpi lio ah ai citmi a mawtaw bomb nih a tlak caah a thihnak hi a si, tiah theih a si. Hi kong hi kan hlathlaipiak u law ka duh, tiah Ukraine a tlawng lio mi French Foreign Minister Catherine Colonna nih a chim. Ukraine rili submarine dinhnak hmun in facang kan kuat khawh ko lai, tiin Putin nih Turkey President Erdogan a chimh. Ukraine rili tinbawdinhnak Russia nih a kham ruangah facang man a kaiter dih, cun a dang nifatin duhherhmi thil tete zong an man a kaiter dih, tiin Western hruaitu pawl nih an mawhchiat ngaingai i, puaisa (broker) hmangin ramdang sin Ukraine facang a zuarnak lam awnpiak than dingin Western hruaitu pawl timhlamhnak an ngeih lio pi a si.
“Black Sea le Azov Sea ah him tein facang tholh khawhnak um kho dingin le, rili ah bomb a ummi vialte hrawhpiak ngeih hi kan i hmaithlakmi cu a si,” tiin Putin nih Erdogan a chimh. “Ka cung i an tuahmi phihkharnak an lim/lak than a si ah cun, non (fertilizer) le cinthlaknak thil le ri tam taktak in ram dang sinah ka kuat khawh ko lai,” tiin Putin nih a chim. “Erdogan he bia kan i ruah i, tirawl kongah le kan ram himbawmnak kong kan i ceih ti. Cun, hi ral hi zeitin dah kan donghter ning a si lai, timi zong kan i ceihti,” tiin Zelensky nih a chim.
Lawlawse cu Pipeline kong Ceihrih lo a si, Russia zinaan kham dingin EU nih lungtlinnak an tuahmi cu Hungar nih a hnonpiak hna. A ruang cu, Russia zinaan hi Soviet chan tein an lak cang i, an pipe nih Ukraine ram a tan caah a si.
Pipeline in EU lei a luangmi/lakmi zinaan kongkau belte cu lawlaw seh kham a si rih theng lai lo. Asinain cu lawlawse kham a si lo mi kongkau zong cu a ran khawh chungin tawlrel a si khawh nak lai, European Council kut ah kan ap colh lai i, cu hnu cun Russia zinaan vialte kham khawhnak lam kan buaiseih lai,” tiin Michel nih news conference ah a chim. Dutch cozah aiawh in gas a caw, a zuartu Netherlands ram hrambunh GasTerra zong Tuesday ri in cun Russia Gazprom sinin gas lak ngol dingin a chim. Credit: Chelsea Bawi
