Related Articles
America um pastors tthenkhat hna nih US senator Mitch McConnell cu tonbiaruahnak an ngeih. Hi tonbiaruahnak an ngeih hi Burma Bill Act 2022 kongkau ah a si i, Chin ramchung ah hin tlukruang tein i zohkhenh khawhnak um seh timi saduhthahnak he tonnak an va ngeih hi a si.
A cunglei bantukah kan rak langhtermi he pehtlai in US, Kentucky State i pastor rian a ttuan cuahmah lio mi kan Chin minung panga nih Burma Bill Act 2022 kongkau ah Washington DC Senator Mitch McConnell cu May 26, 2022 ah khan tonbiaruahnak an ngei tiah theih a si i, cu i an ceihmi cu Chin ramchung ah harsa bawmhchanh khawhnak tibantuk le tlukruang tein i zohkhawhnak timi kha a si.
A tubantuk pastor te nih tonbiaruahnak an va ngeih tikah a tluang ngaingai i hlawh zong a tling hrihrim ko lai tiah zumhnak tampi a um tiah an chim. A lamkip in hi dothlennak ah rian kan ttuan cio a herh timi zong a lang ngaingai.
Ramchung phaisa hmannak ah Myanmar phaisa lawng nan hman lai tiah central bank nih thanh: Myanmar ramchung phaisa hmannak ah Myanmar phaisa lawng nan hmanlai tiah central bank nih May 25 ah theihternak cathanh an chuah. Ramchung thilcawk le thil zuarnak ah ramdang phaisa in i peknak le i zuarhnak a tam caah ramdang phaisa hmannak cu a hmunhma a kau i, ramdang phaisa thlenret(exchange rate) zong ningcang tein a kalter kholo tiah an thanhmi ah an langhter.
Cu ruangah anmah he pehtlaihnak a ngeimi pyithawngsuh vuanci zung lei ramtthen le ramkulh in cozah le private rian, mibu riantuannak chungah thilri cawk/zuarhnak caah hmanmi phaisa langhter tik zongah ramchung phaisa kyats in langhter le hman dingah nawlpeknak an tuah tiah theih a si.
“Vanlawng ticket zong dollars in kan cawk, international sianginn hna zong dollars in pek a si, training kai zong ah cu thiamthiam cu a si. Hotel hna zong dollars in pekkhawh tibantuk a si caah cucu kham an duh tiin ka hmuh” tiah rianngeitu mirum pakhat nih a chim.
