Related Articles
Falam khua ah CDM siangcachim 2 SAC nih an tlaih hna i ni 5 a rauh tiang thlah an si rih lo: Chin ramkulh, Falam khuachung ah a ummi CDM siangcachim Suh Kan Thang le Middle class cachimtu Vai Sui hna cu an umnak inn ah SAC nih June 3 ah an tlaih hna i June 8 tiang an thlah rih hna lo tiah theih a si.
An tlaihmi hna siangcachim 2 hi Falam khua No.1 B.E.H.S in CDM a tuahmi an si. No.2 B.E.H.S siangcachim 5 lawng an um i khuate lei in siangcachim pawl khuapi ah ratter in rian an khinh hnik hna tiah thawngpang theih a si. Falam khuachung ah sianginn a apmi 400 hrawng an um i 300 hrawng an kai tiah theih a si. Tedim khua CDM siangcachim 2 zong a luancia zarh ah SAC nih an tlaih ve hna tiah theih a si.
Ram pumpi ah CDM Siangcachim kir a timmi 2960 lawng an si: Ralkap hruaimi State Administration Council thawngzamhnak (information team) nih sianginn cachim a nuarmi (CDM) a tuahmi hna kir than ko u tiah lemnak a tuahmi a ni a chapchih than (deadline a thawn) tiah theih a si. Daily Eleven, Ralkap lei tang in thawngzamhmi nih SAC nih siangcachim CDM in non-CDM ah kir than in, SAC nih ukmi Sianginn ah cachimh duhmi cu June 14 tiang min cazin nan pek khawh tiah a thanh chap than tiah a tial.
Tuan ah, June 7 tiang ah min cazin pek ding a thanhmi a si nain, minung 2960 tluk lawng nih non-CDM ah kir than ding in min cazin an pek ruang ah a thawnmi si lai tiah ruahdamh a si. SAC thawngzamh ca Global New Light of Myanmar zong ah, siangca chim kir than ding in lemnak an thanhmi cu hmuh khawh a si i, cuchung June 7 tiang ah minung 2960 (siangcachim lawng) kir than ding in cazin an pek tiah a langhter. A hmasa ahcun, May 31 hi a hnubik cazin pek ding ni Deadline ah an chiahmi a rak si tiah Eleven nih a tial.
NUG nih September 2021 ah thanhnak an rak tuah ning ah rampi ah Siangcachim hi CDM a tuahmi a minung in an tam bik i, 300,000 leng an si (siangcachim dilak 430,000 chung ah 300,000 leng nih CDM an rak tuah), zatuak in ngandamnak riantuantu sibawi le nurse hi a tam bik an si, a minung in 43,367 nih CDM an rak tuah. Sianginn hun than a hun zaat tik ah, Ralkap SAC nih siangcahim kir than ding in non-CDM ding in lemnak an tuah lengmang nain, a kir mi an tlawm tiah theih a si. Credit: The Chinland Post
