Related Articles
Tamu in Kalay lei a rak kirmi SAC mawṭaw bom puah hnawh a tong, 30 hrawng an thi: Tamu peng ah SAC ralkap mawṭaw bom puah hnawh a tong i SAC ralkap 30 hrawng an thi tiah PDF-Tamu battalion 3 rianngeitu nih People’s Spring ah a chim.
Tamu in Kalay lei ah a kirmi SAC ralkap 100 hrawng aa telmi mawṭaw cu June 27 zinglei ah bom puah hnawh a si. SAC mawṭaw thluan cu Yanlin le Witot khua karlak ah bom puah hnawh a ton hi a si i SAC ralkap mawṭaw a tlawmbik 3 a rawk tiah khuami hna nih People’s Spring ah an chim. Bom puah hnawh a tongmi SAC ralkap mawṭaw thluan cu Yanlinphai pawng Witot khua telh in a pawngkam khua hna ah hriamngan/hme in kah thlorh a kah tiah Tamu battalion 3 sin in theih a si. SAC ralkap pawl an buai caah Yanlinphai khuami hna zong an zaam tiah theih a si.
June 23 zong ah SAC ralkap mawṭaw pawl cu Yanlinphai le Khunmonnun khua pawngah Tamu PDF battalion 3 nih bom an rak puah hnawh hna. Mah mawṭaw pawl nih mipi mawṭaw pawl hramhram in an tlaih hna i mawṭaw 20 hrawng he an kal lio ah bom puah hnawh a si i mawṭaw 2 a rawk tiah Tamu PDF battalion 2 nih a thanh. Cucaah SAC ralkap mawṭaw hi a kal lei he a kir lei he bom puah hnawh a tong.
Tamu PDF hruaimi mipi hriamtlai phufonh nih Tamu peng, Pantha khua ah hmunhma a khuarmi SAC ralkap le pyusawhtee pawl cu June 22 ah an kah hna i SAC ralkap le pyusawhtee 25 an thi tiah Tamu PDF battalion 3 nih a thanh. A tanglei ah Video zohkhawh chih a si lai.
Kalay lei Thawngpang Relchap: SAC ralkap an rak luh caah Kalay khuami 10,000 hrawng an zaam: SAC ralkap an rak luh caah Sagaing ramṭhen Kalay peng chung khuami 10,000 hrawng himnak hmun ah an zaam tiah DVB nih a langhter. Sagaing ramṭhen, Kalay peng, Tintha khua lei ah SAC ralkap pawl an luh caah June 27 zinglei ah khuami hna ṭihphannak in an khat i an zaam tiah Tinthar khuami pakhat nih DVB ah a chim.
“SAC ralkap pawl khua thlanglei in an rak luh caah zaam a si. An rat cun zeitin an kan tuah lai ti theih a si lo caah zaam a si. Khua luh in inn khangh, an duhmi thilrii lak an hman caah a him lo. A cheu cu khua hrim ah an um ti lo. Ramlak ah deu an i sak i an um”. Tintha khuanu pakhat nih “Khua ah sianginn awn ding in an raa tiah an chim. Khua phungki sianginn ah thazang 200 hrawng an um. Khuachung luh in inn khanghnak pawl a tutiang cun an tuah rih lo” tiah a chim.
SAC ralkap pawl cu a luancia May thla thok hrawngah Tintha khualei an raa i mipi hriamtlai phu he kahdohnak a chuak tiah a chim. SAC ralkap pawl an ratnak Tintha khua B.E.H.S sianguk U Kyaw Min Naing telh in minung 30 hrawng cu SAC ralkap nih an tleih hna i khuate 30 hrawng an khangh. Tintha khua hi inn 2,500 hrawng in mipi 10,000 hrawng khuasa an si tiah DVB nih a langhter. Credit: The Chinland Post
