Related Articles
CDF-Hakha Tuanbia Tawi: CDF-Hakha cu 2021 March 21 in Hakha peng chung pengtlang dihlak aiawh meeting tuahnak in a hramthok a si. 2021 March 26 ah Ralkap thithruainak muisam thok a si. 2021 April 14-15 ah Camp Victoria ah CNF/A upa hna he Chinland Defense Force – Hakha tiah a min pek a si. 2021 April thla ah hriamnam zalh thok a si. 2021 April 29 ah a hmasa bik kahdohnak caah strategy ṭial a si.
2021 May 2 ah a hmasa bik kahdohnak cu Cawbuk Gate in kan thok, nihin ni tiang langhterawk a ṭhami ah voi 76 leng kahdohnak kan tuah cang. Bomb puah le hnahnawhnak pek pawl cu kan rel ti lo. Cu hna pawl tel cun voi 100 renglo ral kan tu cang. Cu chungah cun ralhrang 372 hrawng kan thah hna i 106 naktam nih hliam an tuar. Ralhrang hriamniam 1 kan chuhmi le CDM in an luhpimi zun 7 a si. Ralkap CDM a rak lutmi minung 30 hrawng an si. CDF-Hakha ralkap minung 12 nih an nunnak an pek cang i minung 25-30 kar nih hliamhma an tuar.
Kum khat chungah sing 20,000 leng tangka kan hman. Ram 8 ah CDF-Hakha dirkamhtu phu an kan dirhpiak i cu hna nih cun tangka in an kan bawmh. Vaurawng Zunthil le pumpak zong in bawmhnak tampi an kan pek. 2022 May 28 ni ah kumkhat tlinnak cu Pathian thawng in tlamtling tein kan tuah khawh. Muicawl, CDF-Hakha kumkhat tlin cawlcanghnak.
A cung kong he pehtlai in kan rak langhtermi hi Chinland Defence Force-Hakha official page nih an rak thlahmi a si. Zeihmanh chap le zuhmi a um lo, an rak langhter ning tein kan rak thlah chinmi a si. An rak langhter cang bantuk in nai May 28, 2022 ah khan kumkhat an tlinnak Pathian sin thlacamnak zong hmun pakhat ah an ngei kho, a tanglei ah hin an cawlcanghnak Video zong zohkhawh chih a si.
