Related Articles
MINDAT RALZAAM MIZAPI CAAH HLUTMI INDIA RS 96 SING HLEN A SI, Ramkip phan Mindat nih Mindat pengchung ralzaam mizapi caah thilri, sii-ai cawknak caah ti’n an hlutmi India Rs 96.5 sing (Myanmar tangka in sing 20000) cu hlen a si.
Hi bawmhchanhnak cu Mizoram ah a phanmi NLD ramkulh palai hlun lungtlinnak in Myanmar mi Aizawl ah a ummi Bank Account in kuatmi a si. Ralzaam caah hlutmi a hlengtu hi Myanmar chuak, Aizawl ah a ummi Mangliana@Emma a si tiah theih a si. Ramkip in kuatmi India Rs 96.9 sing a chuah hnu ah a zaam. ” Ramlak ah harsa mi ralzaam caah sii-ai le thilri bawmhchanh khawh a si lo bantukin kum upa hna le ngakchia hna harnak an tong. International Mindat K’Cho Organization (IMCO) nih Mangliana asiloah a chungkhar sinah K’Cho phunglam in bawmhchanhmi ngah khawhthannak lam kan i zuam lai tiah International Mindat K’Cho Organization (IMCO) chungtuan nih a chim.
Bawmhnak a zaam pimi Mangliana@Emma hi tuan deuh ahcun kunhnah zuarmi a si. Mangliana a hnu bik a umnak hi Aizawl, Zarkawt A 31 ah a si, Mangliana@Emma hringtu a pa cu Thantlang peng Dawn khuami Pu Roland a si, hringtu a nu cu Falam khuachuak a si tiah theih a si. Mangliana@Emma hi unau 9 lakah upabik a si, a thaisung nu cu Lalinmawii a si i kum 3 tluk fanu pakhat an ngei.
Zing 2021 zongah International Mindat K’Cho Organization (IMCO) nih kuatmi Thailand tangka Sing riat leng an rak hlen cang hna, asinain Chin media hna le thawnglatu hna bawmhchanhnak in an hmuh than. Credit: The Lairam Times
Haiti Ram ah Buainak Lian Taktak A Chuak Hoi, Rak Rel Hmanh: Haiti Ram Ah A Mibu Buainak A Chuak, Minung 200 Leng An Thi Cang. Haiti khualipi ah mibu buainak hi a karh chinchin ruangah thlakhat chungah minung 200 tluk an thih pin ah a dang thong tampi nih inn-lo ngei lo dirhmun ah an i chuah tiah (OCHA) cathanh chuahmi ningin theih a si.
Hriamnam tlaitu phu le phu i zuamcawhnak cu Port-au-prince khuapi ah April thla dih lei thok khan hmunhma an rak i cuh. Inn-lo chuahtak in caan karlak chung ahcun deu/thlam tibantuk ah ngakchia telh in minung 16800 nak tam cu um dingin an fial hna. Buainak cu a veng le a sang in a karh chin lengmang cang i, chungkhar 100 leng cu phu khat le phu khat i kahdohnak ah tlaih an tong .
April 24-26 tiang ah a thimi 188 chungin 92 hna cu hriamtlai phu chungtel an si lo tiah theih a si. A dang minung 113 hna nih hliam an tuar i, minung 12 an tlau pinah kidnap a tongtu hi minung 49 bak an um tiah (OCHA) nih an chim. Kahdohnak a chuahnak pengkomh chungah luhnak nawl an phihkham hna caah a thimi hi atu nak hmanh in an tam deuh kho tiah (OCHA) zung nih ralrin peknak an chim.
Cu bantuk buainak a chuah lio ah UN Security Council nih Haiti ah hmailei karhlan nak ding kong he pehtlaiin tonbiaruahnak ngei dingin timhtuahnak an ngei tikah ramchung nawlngeihnak he pehtlaiin biahal ding tampi a um tiah (OCHA) a chim.
