Related Articles
Myinmu khua ah mipi 4 hmai ah an tlikter hna i an hnulei in meithal in an kah hna: Sagaing ramṭhen, Myinmu peng ah SAC ralkap nih mipi 4 cu an tlikter hna i an hnulei in meithal in an kah hna tiah Myinmu hmunhma thawngzamh nih an langhter.
June 5 chung sml 1:30pm hrawngah SAC ralkap pawl cu Htisaung le Kanphya khua lei ah thazang 80 hrawng he an lut i Kanphya khuachung ah an hmuhmi thlam pawl kha mei in an khangh, Kanphya khuami 1 zong an thah tiah theih a si. Cun, khuami cheukhat hna zong an tlaih hna i “Nan luat khawhnak in zaam uh tiah ramvaih bantuk in an tlikter hna i an hnulei in an kah hna i khuami 4 an thi” tiah Myinmu peng thawng dik thanhtu phu nih an langhter.
Cun khuami 1 nih “Upa pakhat cu phenet a char lioah ralkap pakhat nih a hmuh i a tli lai tiah a ruah i a ka a an. A ka chungah meithal a hmuah i a kah. Nu pakhat zong a bag chung ummi thil vialte an chuahter dih i sui le tangka tampi a um caah hramhram in an chuh chih. An chuhmi a man zapi te sing 100 hrawng a si lai” tiah a chim. SAC ralkap pawl nih a cunglei an thahmi hna telh in Kanphya khuami 7 zong an thah hna lengah minung 11 zong hostage caah an tlaih hna tiah PAFD nih a langhter.
Mindat le Kanpetlet mino pawl Malaysia le Thai ah a tanglei lam in a kalmi an tam: Chin ramkulh, Mindat le Kanpetlet khua mino hna chungin a tam deuh cu Malaysia le Thai ah a kalmi an tam cang tiah theih a si.
A hleikhun in a kalmi hi kum 18 hrawnghrang nu pawl an si i pa tlawmpal te lawng an i tel tiah theih a si.
“Mindat le Kanpetlet mino pawl sianginn zong an kai kho ti lo, rian zong an ngei fawn lo, a hlan ahcun lo ah tawlreba an cing na, coffee a cing na an si. Atu cu rianṭuan awk a um ti lo caah ramdang kan phak cun a za, zeibantuk in ka kal zongah a poi lo tiah an ti dih cang. Chungkhar hna zong nih khua ah thah an tong lai maw? Tlaih an tong lai maw? tiin tinphang in an um caah ramdang kal hi luatnak pakhat bantuk a si cang” tiah Kanpetlet khuami pakhat nih Mizzima ah a chim.
A tulio Malaysia ah a tanglei in a kalmi minung 1 ah sing 30 hrawng an dih tiah theih a si. Ramdang ah a kaltermi brokers pawl nih Yangon in Malaysia tiag direct an kuat hna i lampi tlaih an ton tikah a tawlrelpiak mi an um bantuk in tawlrelpiak um loin a zaammi brokers pawl zong an um tiah theih a si. An lam a tluan a si ahcun, zarhkhat ah Malaysia an phan tiah theih a si. Credit: The Chinland Post
