Related Articles
Amber Heard cu Saudi ram pa pakhat nih ‘Keimah dah ti lo cu ahohmanh na ngei ti lo’ tiah ca a kuat. Saudi Arabia in pa pakhat nih Amber Heard cu i nei ding in a sawm, hihi Heard i a pasal tthing/hlun Johnny Depp he i tthennak tazacuai konghe pehtlai in biaceih zungah a sungh caan tlawmpal ah tubantuk in cakuat a don hi a si.
Amah i a hmanmi official Instagram ah tubantuk in Saudi pa pakhat nih aw hmang in (voice) ca a kuat hi a si, a timi cu na sungh zatlak konghe pehtlai in na caah cun inn ka pit dih hmanh seh kei ka caah cun kut ka aa hong peng ko tiah a ti i cuticun ca a kuat ning a si. Johnny Depp le Amber Heard sining cu vawleicung pi nih theih cio a si, voi sarih tiang te biaceih zung ah biaceih an si i, Johnny Depp caah a tir ahcun thil rit ngaingai a rak lo. Hmanhsehlaw Pirates movie i mintapa Depp cu bia an ceih hna caan tlawmpal ahcun social media lei in dirkamhtu le ttanhpitu tampi a rak ngei, Amber belte cu huatu tampi he sunghzatlaknak nih a khuh tthan hi a si.
“Amber…kutkaa vialte na caah khar dih a si cang, keimah dah ti lo cu mizeihmanh nih an in zohkhenh kho ti lai lo” tiah min langhter lo Saudi pa pakhat nih cun voice in Amber cu ca a kuat hi a si, cucu anmah Saudi holh in a chim i Gulf News nih translations a rak tuah mi kan rak langhter. “Mi tampi nih an in huat i an in zawmhtaih ti ka theih, cu caah cun, keimah nih hin nangmah cu tthit dingin biachahnak ka rak tuah hi a si. Allah pathian nih kan pahnih in thlua kan chuah hram seh. Thluachuak nu na si nain mi tampi nih an in thei lo. Kha putar (Johnny Depp) nak cun ka ttha deuh hrimhrim ko lai” tiah a voice cakuat cu a donghter, a pasal hlun Johnny Depp zong hi cakuat ah a sirleih pah ti a lang.
Hi voice cakuat konghe pehtlai in a laar ngaimi Instagram page Bee4andafter_kw timi nih a rak taar, cu an taar le cangka nithum hnu ah, a hung laar ngaingai i 1.6 million nih an view (zoh) colh. Johnny Depp le Amber Heard biaceih zung an chuah konghe pehtlai in Heard nih hin 2018 lio ah The Washington Post ah khan kei cu “inn chungkhar i sikvelhnak a tongmi hna dirkamhtu ka si” tiah a rak i chim bal. Cucu Depp le a phu hna nih an i chirhchanbikmi a si tiah an chim i cu nih cun Amber Heard caah sunghzatlaknak tiang a phanhpi tu zong a si chih tiah an chim.
