Related Articles
Yesagyo ah LIB 101 nih nau pawi lio nu 1 telh in minung 5 an khangh hna: Magway ramṭhen, Yesagyo khua hnulei ah nau pawi lio nu 1 le a dang nu 2 telh in minung 5 a nun buin a khangtu hi LIB 101 kuttang ah a ummi ralkap pawl an si tiah Northern-Yesagyo (N-YSO) phu nih an thanh.
Khangh a tongmi hna hi N-YSO chungtel a si i thla 5 nau a pawl liomi CDM siangcachim Daw Khin Hnin Wai, Nurse Daw Za Li Naing, CDM sianguk U Win Kyaw, thil kuatu Ma Thae Ei Ei Win le hriamtlai U Htay Min Oo hna an si tiah N-YSO nih a chim. LIB 101 cu Magway ramṭhen, Pakukko khua ah hmunhma a khuarmi a si i minung 5 a khangtu ralkap hna hi LIB 101 hruainak tangah a ummi Yesagyo hrambunh Infantry No.256, 257 le 258 an si tiah N-YSO nih a thanh.
A cunglei langhtermi Infantry hna nih Yesagyo chaklei, Chindwin tiva a hnulei Dapinkan khua le Tegyi khua karlak N-YSO sakhaan pakhat an luh hnawh hna lioah CDM sianguk telh in minung 5 an tlaih hna i an khangh hna hi a si tiah N-YSO nih a chim. “Sianguk hna hi kahdohnak chungah an i tel sual. A nunnak a liammi kan hawile an ruak cu chun sml 1 hrawng ah hmuh a si. Kan hmun dan hna hi lungfak a si ko. A ho an si zong a fiang tein thleidan khawh a fawi lo. An ruak a rak ṭhen dih cang” tiah N-YSO thawngthanhnak rianngeitu pakhat nih The Irrawaddy ah a chim.
An ruak pawl cu an ke um ti lo in an khangh hna hnu ah N-YSO sakhaan pawngah an phummi hna kan chuah ṭhanmi a si tiah a chim. A tubantuk in an kan thahpiak hna caah kan lung a fak khun i hramhram uknak hi kan doh chin lai tiah a chim.
SAC nih Kanpetlet hmunhma tlaihding aa timh caah kahdohnak a fak kho tiah CDF-Kanpetlet nih ralrinnak cathanh a chuah: SAC nih Chin le Magway a tonnak ah a ummi Kanpetlet hmunhma tlaihding in aa zuam caah kahdohnak a fak kho tiah CDF-Kanpetlet nih ralrinnak a pek i a raa laimi kahdohnak caah zen le kuan bawmhnak pek ding in mipi sinah nawlnak an tuah.
Kanpetlet peng nichuah lei ah Magway ramṭhen, Kyaukhtoo, Saw le Laungshay khua hna an umm i a hnulei ah Paletwa peng, Mindat peng le Matupi peng hna he an i tlai i SAC caah raltuknak le hmunhma khuarnak a rem bik hmunhma a si tiah a chim. SAC nih Kanpetlet khua ah hmunhma khuar kho ding in thazang tampi a hman i Mindat le Kyaukhtoo khua in hriamngan kah an bawmh lengmang. SAC nih CDF-Kanpetlet Headquarter lakding in kahdohnak a tuah lengmang ko nain CDF-Kanpetlet lehrulhnak le kahdoh an thiamnak ruangah SAC cawlcanghnak hmual a ngei lo tiah a chim.
Tu thla chungah, SAC ralkap thazang 185 he kahdohnak a tuah i June 9 thok in ni 5 chung pehtlai in kahdohnak a chuak i SAC ralkap hnu an kir ṭhan, CDF-Kanpetlet nih an lehrulh dan a fah tuk caah June 13 ah an kir ṭhan ko nain June 15 ah SAC nih Magway ramṭhen, Laungshay peng le Kyaukhtoo ah thazang a chap ṭhan tiah theih a si. Cu bantuk dirhmun caah timhcia tein kan um khawhnak hnga hriam, kuan le tangka bawmhnak tampi kan herh rih ko tiah CDF-Kanpetlet nih a thanh.
A luancia ni 5 chung kahdohnak ah hriam a tlawm ruang le khawn chom a simi kuan pawl a dihlak ngawt in hman a si caah a caan um lio te ah i khawn ṭhan a hau tiah CDF-Kanpetlet nih theihternak a tuah. Cucaah, mipi hna nih a raa laimi kahdohnak caah timhcia tein kan um khawhnak hnga ti khawhnak lam cio in bawmhnak pek ding in CDF-Kanpetlet nih rianrang in bawmhnak a hal. Kanpetlet peng hi Chin ramkulh chungah a ṭhangcho lo bik le milu an tlawmbik nak a si caah Chin mipi hriamtlai chung zongah a sifak bik a si i dothlennak kumkhat leng caan chungah Kanpetlet peng uknak le hriamtlai phu hmanmi tangkha hi sing 3,000 leng lawng a si tiah a langhter.
Kamkhat lei zongah SAC ralkap nih mipi inn a hrawh, mipi hna khawnmi rawl zong a hrawh dih caah inn le lo a zaamtak mi hna caah bawmhnak an herh tuk tiah theihternak a tuah. Credit: The Chinland Post
