Related Articles
Vawleicung tawttawk ttha bik le pumrua ttha bik tiah a laar vemi Kim Kardashian nih cun “no ka hlawh deuhnak ding a si ahcun ek ei zong a poi ah ka chia lo” tiah a chim. Kim Kardashian hi ramthumnak khuasa le bang nih cun nan theih tuk lai, a nih hi zohdawhlo Video zong a tlangval pa he a rak i thla bal cangmi an si i vawlei cung pumpi ah cu an video zong cu mikip nih hmuh le zoh a si i cu thok cun a laar ning a zual chinchin.
Kim Kardashion hi fashion lei ahcun a laar taktakmi a si pinah an chungkhar ning in Reality TV show, Keeping Up With The Kardashians timi zong in mi tampi nih cun an theih i tu lio vawleicung ah cun uar taktakmi nusal pakhat a si. Kim hi zeibantuk thil paoh aa hruk/aih ngammi minung a si, Hnuk langh tibantuk hna hi cu zei ah a rel ve lomi a si i a chiattha lang deng tiang hna in thil aa hruk/aih ve mi a si. Nai te zong khan 2022 Met Gala i Marilyn Monroe nih a rak i hruk tawnmi thil i hruk ding a si caah zarkhat chung lawng bakah hin 16lbs bak a rihning a tthumh khawh, cu zong cu mi tampi nih an soisel ngaingai. Kan hnung zong ah a rak chim mi cu Fashion lei a si paohpaoh ahcun upa diaper hmanh i hruk ka ngamh tiah a rak ti.
A tu zong Kim nih amah kutchuak skincare tharchuah a timh ve i cucu a min ah SKKN by Kim ti a si, cu i interview an tuahnak ah cun mino bantuk tein kan mui aa sersiam tthannak ding a si tham ahcun zeihmanh kan tuah ngam lo ding khi a um lo, minung chung in a chuakmi ek zong hi ka ei ngam ko lai tiah a ti. “Nichiar te hi ek ei law no na hlawh deuh lai na ka ti a si ahcun, ka ei ko lai, ka ei ngam bak ko lai” tiah nolh in The New York Times ahcun a chimning a si.
Hmanhsehlaw Kim na thinphang hlah, hlathlainak pin ah science thiamsaang lei nih an tuak leen zongah an tuak khawh lomi cu minung ek ei nak nih no a hlawh deuh ti hi a si i cucu ek ei nak nih no a hlawh kho hrimhrim lo. Cu caah cun ei hrimhrim hlah tiah capo phun in an ti. Cun cu ka interview an tuahnak tthiamtthiam ah cun Kim nih zarkhat chung i a rih a zortermi cungah soiselnak tampi a tonmi he pehtlai in lehnak le chimnak zong a ngeih chih. Kha kong kha mi tampi nih cun thil ttha ah an ruat lem lo zeicatiah zarkhat chung i kha zatzat rih zorter khawh cu thil ttha lo zong a tuah i maw si hnga cun mi laar pakhat an si i mi tampi nih zohthla taktakmi an si tikah an i cawn ve sual hna lai ti zong an phaan caah khan a si.
Kim zong nih cun zarkhat chung i ka rih ka tlaakter kha zeihmanh thil ttha lo ka tuah hrimhrim lo, Actor pakhat nih video aa zeih lai i thau a herh caan ah aa thau ter, der a herh caan ah aa der ter, cubantuk cu ka si ko tiah a ti. “Zeihmanh thil ttha lo, a ngandamlomi thil zeihmanh ka tuah lo. Ka caah cun zei paoh a ttha dih ko. Christian Bale (movie actor) zong nih a movie caah aa derter ve ko i an cohlan dih ko, cun Renee Zellweger zong aa thauter ko. Kei zong anmah bantuk tthiamtthiam kha ka si ko. ‘Caan tawite karlak ah na rih na zorter lo tiah midang ka va ti hna lo i a chim zong bia in ka chimnak a um lo'” tiah faak ngai in lehnak a tuah cu a si.
Kim Kardashian zong nih cun a timi cu tubantuk khan ka rih kha zor hlah sehlaw tukum Met Gala ah khan ka kal lo men lai tiah a chim. “Kha tluk khan ka rih ning kha tla hlah sehlaw Met Gala zong ah khan ka kal hgna lo, kei ka caah cun kaa timhmi ka phaak kha a biapi tuk” tiah a chim.
