Related Articles
Wetlet Pengchung Kahdohnak Ah SAC Ralkap 40 An Thi I, PDF in Ralkap 11 Nunnak A Liam! Wetlet Pengchung Kahdohnak Ah SAC Ralkap 40 An Thi I, PDF in Ralkap 11 Nunnak A Liam!: Sagaing ramṭhen Wetlet pengchung kahdohnak ah tualchung hriamtlai phu PDF in ralkap 11 an nunnak a liam i, SAC ralkap lei in minung 40 hrawng an thi, tiah Shweboo pengkomh battalion 15, Tiger King pah-kah-phah phu nih nihin July 5 ah cathanh an chuah.
SAC ralkap hna cu minung thazaang 150 hrawng he Wetlet peng WetLayYuai(ဝက်လည်ရွဲ) khua ah July 2 ah rallam an sial i PDF battalion 15, ṭat-khuai 1 nih bomb puahhnawh in an doh hna caah SAC ralbawi pakhat le ralkap dang pakhat an thi i, 3 nih hliam an tuar, tiah an langhter. SAC ralkap nih hriamnam thazaang faak ngai in an hman caah le hriamnam thazaang an i thlau tuk caah, tualchung hriamtlai phu lei cu hnu an tolh, tiah theih a si.
July 3, zinglei suimilam 6:00 hrawng ah Minyua(မင်းရွာ) khua zaanriak in umhmun a khuarmi SAC ralkap hna nih khuachung mipi umnak innlo cu a voi hnihnak an khangh ṭhan caah Tiger King battalion 15 le tualchung hriamtlai phu 15 fonh nih zinglei suimilam 8:30 in chun suimilam 12:00 tiang an kah hna. “Battalion 15, tualchung hriamtlai phufonh le SAC ralkap kahdohnak ah tualchung hriamtlai phufonh lei in nunnak liammi zong an um. Minyua khuami minung 5 telh in khuami cheukhat zong thah an tong,” tiah GZ Special Task Force-Wetlet in Ko Ye Khae nih a chim.
Nunnak a liammi PDF chungtel 11 hna cu PaDaukChung(ပိတောက်ခြုံ) pah-kah-phah, Magway phu, GwayPinKung(ဂွေးပင်ကုန်း) phu, HliatSi(လျှပ်စီး) pah-kah-phah phu le YuaTitKung(ရွာသစ်ကုန်း) LDF chungtel hna an si. Minyua khuami 5 telh in khuami cheukhat zong thah an ton caah mipi lei in nunnak a liammi 20 hrawng an si, tiah theih a si. Nihnih chung kahdohnak ah SAC ralkap lei in minung 40 hrawng an thi, tiah Tiger King battalion 15 nih cun an langhter.
Thawngdang Relchih Hmanh: Sagaing Ramṭhen Ah Ramdang Kal Ding In Mino Sing 1 Leng Nih Passport An Sawk! Sagaing Ramṭhen Ah Ramdang Kal Ding In Mino Sing 1 Leng Nih Passport An Sawk! Sagaing ramṭhen ah mino sing 1 leng nih ramdang ah kal in, rian an ṭuan khawh nakhnga tukum hramthok khan passport an sawk hna, tiah Sagaing ramṭhen passport pekchuahnak zung i rianṭuantu hna sin in theih a si. “Nikhat ah minung 200 leng passpost tuah ding in ah an ra i, ramdang ah rianṭuan ding in a sawk mi an si hna, a tam deoh cu mino an si,” tiah Monywa passport pekchuahnak zung i rianṭuantu pakhat nih cun a chim.
Passport ser aa tim mi Depeyin peng mino pakhat nih, “Covid a chuah hlan khan rawl dawr (restaurant) ah rian kan ṭuan i, Covid zawtnak a chuah hnu 2020 in rian kan i din, kaa dinhnak kum 3 a si cang caah Thailand ah rianṭuan kan i tim, a bu in kan kal lai, kannih bu hi minung 80 leng kan si,” tiah a chim. Monywa i passport pekchuahnak zung an on ni poh ah passport aa tuah mi cu nifatin minung 200 leng an um. Cu hna lak ah cun rambuai ruangah harnak a tong mi mino tampi an um, tiah zung rianṭuantu hna nih an chim.
Mino hna ramdang chuah kong he pehtlai in Yinmapin peng in mino pakhat nih, “Mino pohpoh cu dohtlennak ah i tel ding in nawl chuah a si, nain a ngandam deoh mi hna lawng dohthlennak ah an i tel kho i, a tlinh lo mi cu ralzaam dirhmun phak a si. Khuachung ah rian ṭuan awk a har pinah khualei i kir khawh a si ti lo caah ramdang chuak kan tam nak hi a si,” tiah a chim ve.
Passport tuah ding in a kal mi hna cu Butalin (ဘုတလင်), Chaung U, Khin U, Ye U, Tanhse, Kanhbalu(ကန့်ဘလူ), Myinkin(မင်းကင်း), Kalay, Kani, Yinmapin le Salingyi(ဆားလင်းကြီး) peng hna in an si tiah theih a si. Yangon le Mandalay khuapi i passport pekchuahnak zung zong ah passport tuah aa tim mi an tam ngai, tiah theih a si. Yangon i Korea, Malaysia, Japan le Singapore Embassy zong ah an ram luhkhawhnak(visa) a sawk mi an tam ngai, tiah theih a si. Credit: The Chin Post
