Related Articles
India Mi 2 Ruak An Pek Hna Lo Caah Duhlonak Langhter In India Mi Nih Palik Sakhan An Khangh!: India ram, Moreh khuami 2 cu nizaan July 5 ahkhan Tamu khuachung ah pyusawhṭi nih an thah hna i, an ruak cu hi thawng kan hlat tiang ah India lei i an pek rih hna lo caah Moreh khuami hna nih ramri palik sakhan pakhat cu an khangh, tiah theih a si.
Cun, ramri gate pawng ah a ummi Ko Tant Zin lakphakti dawr cu lung in an cheh caah hliamhma tuar mi zong an um, tiah an chim. Cu hnu ah SAC ralkap nih meithal voi 15 hrawng an puah i Moreh khuami hna cu India ralkap le palik nih zohfelnak an tuah hna, tiah theih a si. Thah a tongmi Moreh khuami 2 cu kethum ngei(tung-bing) motor khaltu an si i, Tamu khuachung i thil an pek hna lio ah pyusawhṭi nih an lu ah meithal in voihnih veve kah hna i, an nunnak a liam. India lei ah an ruak kuat khawh a si nakhnga India ralkap nih SAC ralkap sin ah biaruahnak a ngeih hna i, zinglei suimilam 8:00 ah ruak nan lak khawh lai tiah an chimh hna nain, zaanlei tiang ah ruak an pe rih hna lo, tiah theih a si.
India rammi Myanmar ramchung i thah an ton ruangah Moreh khuachung ah Myanmar mi thil zuartu hna cu nihin zinglei ah dawr an ong hna lo, tiah theih a si. Cun, Moreh khuachung ah ralzaam dirhmun in a ummi Myanmar mi hna cu leng chuak lo ding in anmah le anmah ralrin an i pe hna, tiah theih a si.
India-Myanmar Ramri Cawlehthalnak Hmun 3 On Ṭhan Ding In Ceihmai A Si!: India le Myanmar ramri chawlehthalnak hmunpi 3 on ṭhan ding in kaphnih kar ceihmaiṭinak an ngei tiah theih a si. Cu chawlehthlanak hmun 3 hna cu Covid-19 zawtnak a chuah ka te khan rak khar mi an si i, zawtnak an daih deuh cang caah a rauh hlan ah on ṭhan timh a si. India le Myanmar chawhlehthalnak hmun ngan bik Tamu lam zong on ṭhan ding in timhlamh a si. Tamu-Moreh chawlehthalnak hmun in ram 2 kar chawlehnak hi $ sang 90 fai man tluk a si.
Covid ruangah India-Myanmar chawhlehnak cu a ṭumchuk ngai, tiah Indian express nih an langhter. Myanmar ram in kuva thei(ကွမ်းသီး), thing mekphek(hmathak), be phunphun le khachuan tbk. pawl cu India lei ah kuat a si i, India lei in cycle le a thilri pawl lengah tumpaang, changvut, vawlei non le plastic thilri pawl an kuat ve. Chawlehnak hmun on an timhnak hmun pakhat Rih (Zokhawthar) tu cu SAC le tualchung hriamtlai phu kahdohnak a faak ngai nain, SAC nih kan uk khawh ko an ti caah on zau ding in timhtuah a si, tiah theih a si. Credit: The Chin Post
