Related Articles
Zahan i The Chin Post nih Hakha Khuapi No. 1 Sianginn Hrawng ah Bomb a puak tiah a rak langhter. Hi a puah caan hi zaan suimilam 9:30 PM hrawng ah si dawh a si i nihin zinglei ceu ah kha bomb puahnak in CDF pasalttha minung pahnih an thi tiah theih a si.
An ruak zong hi SAC ralkap nih an laak tiah khuami tthenkhat hna nih cun an chim i, a nunnak a liam chungah pakhat hi a min cu Rom Lian tiah theih a si i tthangthar mino te a si rih. Pakhat min belte hi fianghlang in theihkhawh a si rih lo. Cun tualchung media The Chin Journal zong nih CDF minung pahnih an thihnak kong zong fehternak ttha tein a tuah cang.
Zahan bomb puahnak kong ahcun The Chin Post nih tihin an rak langhter “Nihin July 7 zaan sml 9:30 hrawng ah bomb a puak. No.1 sianginn chung ah a puakmi a lo ko. A thawng thang tuk hringhran. Bomb pelpawi zong kan inncung ah a tla,” tiah The Chin Post ah a chim. Hakha No.1 sianginn cu SAC nih an hun i, siangngakchia 2000-3000 kar an kai lai. Siangngakchia hna cu anmah duhmi thil hruk in a kaimi zong an um.
Siangngakchia sianginn an kai caan zinglei poh ah sii-inn lamṭhen in palik nih humhimnak an lakpiak hna. Cacawn caan a dih in siangngakchia an ṭin zong ah palik nih an congh hna, tiah Hakha ummi pakhat nih The Chin Post ah a chim.
