Related Articles
Laimi Le Bu: Kan zeidek a kan molh. Bu kan i ziak rua loh. A zatlang hin kan si. Bu pakhat hruaitu asiloah rian pakhat in kan i dinh tikah kan mibu kha buaicur in kan chiahta lengmang. Nehzulh le phalh har emem in hruaitu (thar) nih pehzulh a si theo. A thar lengmang in thawk a si. Mibu chung ah kan chiahta mi virus hoi hna cu a thahnak ding ah caan ti mi sii hman a hau. A tlawmbik term cheu lengmang a dih. Hihi Laimi nih a fek mi instituition ngei mibu ser kan i harhnak a ruang pakhat ah ka ruah.
Mibu kan ser tikah hruainak Protocol, hruaitu TOR le governance structure fiang ko in kan ser a herh. Kan fian i dengteo zulh zong a biapi hoi. Kar hlei lamh cio lemlo ding. Mibu i a vision, objective hna zong ca in fiang ko in tial mi kan umter a herh. “A tluannak in” timi easy way nih a tluang lo mi a chuahter theo. Cun, mibu chung kan um tikah mibu nih ai tinhsel mi kan fian ko ahcun—nuar/dinh hman bak lo ding khi a si ko. Midang lung a zor. Voikhat hmahmuah hnu ahcun kan i zenh.
A tulio ah ka uar ngai mi bia cu capacity building a si. Mipi le hruai mi hrimhrim hi kan lungput khuaruahning siamremh kan hau. Khuaruahnak thanchoter kan herh. Hruaitu lila zong workshop, training…,tbk kan ngeih lengmang a herh. Democracy le acozah, Democracy le ralkap, Democracy le phungzulhnak, Democracy le a ram mi kong…tbk a tamtuk. Kan cawn cuahmah a herh ko cang lai. Lenglei thlennak cu voi tampi thlen khawh a si ko nain, chunglei lungput le nunphung thlen cu fawi te ah ai ser kho lo. A fek mi mibu cu thimnak ah hruaitu thlennak a um fatin, hruaitu hlun upatnak, term dih ruang ah sianlonak le hruaitu thar lawmhnak he an khat. Laimi cu thlennak a um fatin, mibu kan zaw. Kebeh phalh ding a tam.
Kan khel mi Democracy ram ca ah hin kan i ready te hnga maw? Democracy instituition le Federal nunphung ti mi hna hi kan i ziak te zokzok lo hmanh maw. Cu ca ah, civil society le NGOs hna zong nih a tu te hin Democracy nunphung taktak hi mipi sin ah kan cawnpiak pah cang ko u. A um cia mi bu hi fun cuahmah i, a fek mi tungtlang nih fektthup in ser i, huapbu ser i zuam kan hau ko hih. Sang le zaantling lo bu hna ah thlatling loin nau kan hrawh tawn. Cu mibu a theipar cu tthennak le kuainak hna an si. Ka zenh ngai ko. Dinmadik le thiamthih te khin. Ka hmuhning a si. Credit: Pa Hniang (CDF Hruaitu Pakhat A Si).
Thawngpang Dang Relchih Hmanh: Telecommunication Company ‘Ooredoo’ Cu Myanmar Ram In An Chuak Cang Lai!: Myanmar ram mi nih an hman bik telecommunication company pakhat, Ooredoo cu Myanmar ram in chuah an i timh caah zuar an timh cang, tiah Reuster nih nihin July 20 ah a ṭial. Ooredoo cawk aa tim mi company hna lak ah Yangon hrambunh Young Investment Group, Singapore ah dirh mi Campana Group le Skynet Company hna cu an min a lang, tiah theih a si.
Cu kong he pehtlai in Ooredoo cu Email cakuat in biahal a si nain atu tiang ah cun zei kong hmanh theih a si rih lo. Cawk a duhtu company hna zong pehtlaihnak an tuah ko nain bia lehnak an tuah rih lo, tiah Reuster nih an langhter. Doha, Qatar hrambunh Oredoo company nih cun Myanmar ram nawlngeitu, Myanmar’s Post le Telecommunication Department hna cu Company zuar an duhnak kong an theihter hna, tiah hi thawng a hlattu hna nih cun an chim. SAC nih uknak an lak hlan 2020 ah Ooredoo a hmangtu minung hi 2020 15 million(nuai 15) an si i, Myanmar ramchung i company nganlei ah 3 nak a si.
2022 ah cun Ooredoo a hmangtu cu minung 9 million (nuai kua) lawng an si cang i phaisa a lut mi hi US $ 330 million(nuai zathum) a si, tiah an langhter. Myanmar ram ah SAC nih uknak an laak hnu in telephone le internet service company pawl cu harnak tampi an tong i cheukhat hmunram ah cun internet phih a si.
