Related Articles
Kalay Peng Kahdohnak Ah SAC Ralkap 15 An Thi, Tiah Kalay-PDF Nih An Thanh!: Kalaymyo peng Kin Mon Chung(ကင်းမွန်းခြုံ) khua nichuah lei ah SAC ralkap le tualchung hriamtlai phu hna cu nizaan July 21, zinglei suimilam 8:00 ahkhan an i kap i, cu kahdohnak ah cun SAC ralkap 15 an thi, hliamhma tuar zong an tam ngai, tiah PDF-Kalay nih nihin July 22 ah cathanh an chuah.
PDF-Kalay nih cathanh an chuah ning ah, SAC ralkap nih Myitta tiva nitlak lei Kan Pale(ကံပုလဲ) khua cu hriamngan in an kah i, zaanlei suimilam 4:00 hrawng ah SAC ralkap nih Kin Mon Chung (ကင်းမွန်းခြုံ) khua inn 7 cu an khangh. Cun, zaan suimilam 9:00 hrawng ah Kalaymyo nichuah lei Pyinta(ပြင်သာ) khua i tilawng 2 nih SAC ralkap a thimi le hliamhma tuarmi hna cu a thiar hna hnu ah Kin Mon Chung(ကင်းမွန်းခြုံ) khua in Kalaymyo lei ah an kir țhan, tiah an thanh.
SAC ralkap nih an rak phummi bomb ruangah PDF – Kalay chungtel pakhat hliamhma a tuar, tiah an thanhmi ah cun an langhter chih. “Kanmah lei in ralkap pakhat hliamhma a tuar i, SAC ralkap hmanhmi bomb nih a ke khatlei a hliamh. Sii-ai thlopbul khawhnak hmun ah kalpi a si, a thi chuak mi a tamtuk caah thinphang ngai a si ko” tiah Kalay- PDF chungtel pakhat nih a chim. SAC ralkap hna cu PDF-Kalay(battalion 1,2,5,6,7), pah-kah-phah Kalay, CNDF-Vakok, CDF-KKG le RKDF phufonh nih an kah hna, tiah theih a si.
Thawngdang Relchih: Mindat Peng Ah Tender Company Pawl Cu Rianṭuan Khawhnak Nawl Pek An Si Ṭhan Lai Lo! Mindat peng khuate pawl ah SAC ralkap pawl cu a thithup in an luh khawh caah tender company pawl cu rianṭuannak nawl pek an si ṭhan lai lo, tiah Mindat zatlang uktu phu nih an thanh. SAC nih ṭhanchohnak rian tawlrel mi pawl cu zei bantuk company le organization an si zong ah ṭuannak nawl kan pe lai lo, tiah nizan July 21 ah cathanh an chuah ṭhan.
Mindat peng mizapi thatnak ding ah tiin rian a thiam mi company le hlawhtlinnak a ngei cang mi tualchung company hna cu rianṭuannak nawl pe ding in July 19 ah cathanh an rak chuah. Cu bantuk cu a si nain, zatkang uktu phu le CDF Mindat nih ceihmaiṭinak an ngeih ṭhan hnu ah tender Company rianṭuannak nawl cu phihkhar ṭhan ding in Mindat peng zatlang uktu phu nih July 21 ah cathanh an hun chuah. An cathanh i a langhning ah, SAC tang company pawl he rianṭuanṭi ahcun SAC ralkap hna cu khuachung a thlithup in an lut kho lai i, cucu zatlang uktu himnak ah a ṭha lo tiah ruahnak an ngei, tiah theih a si.
Cucaah SAC cozah tawlrelmi rian pawl cu zei bantuk company le organization hmanh ṭuan khawhnak nawl pek an si lo, tiah an thanh. July 19 i an rak chuah cang mi cathanh zong atu cathanh chuah thar mi hin kan hnon ṭhan, tiah an langhter. Credit: The Chin Post
