Related Articles
Mizoram palik nih rithaisii an tlaih hoi, hitining te a si ko ahcun tthawl hna hi kan tongte lai lo tiah chim awk a ttha bak ti lo. Kawlram mi sin ah rithaisii an tlaih hi a tam in a tam tuk hringhran cang. Nizaan tihni zongah khan Kawlram phaisa in Kyat 3287 man bak Mizoram, Champhai ah an tlaih hoi.
Hi konghe pehtlai in Zalen media zong nih nihin ah a rak thlah, an langhter ning cu tihin a si “Mizoram, Champhai khua pawng Khankawn gate an check nak ah rithaisii Gram 255 tluk a rit mi India phaisa in Rupee 12750000 man (Kyat 3187 ting leng) man cu July 20 ah a ngeitu um loin an tlaih tiah Mizoram palik sin in thawng kan theih.
Khankawn motor check nak gate ah rithaisii cu Bluetooth speaker chung ah an sanhmi an hmuh a ngeitu belte cu a zaam manh tiah thawng kan theih. Champhai khua hi Myanmar ramri in suimilam cheu tluk lawng kalnak hmun si.” ti’n Zalen nih cun an langhter ning a si i a ngeitu belte hi tutiang an tlai kho rih lo tiah theih a si.
Thawngpang Dang Relchih: Education Department In CDM Tuahtu Minung 200 Leng Tlaih An Tong! Nunnak Liammi 24 An Um!: Myanmar ram pumpi in Education department rianṭuantu cu minung sing 4 le cheu leng an um i, SAC ralkap nih uknak an laak hnu ah Civil Disobedience Movement (CDM) a tuahmi cachimtu sing 2 leng an um, tiah NUG Ministry of Education cazin ning ah theih a si.
SAC ralkap nih uknak an laak kum khat le cheu chung ah education department in CDM a tuahtu minung 209 cu tlaih an tong i, SAC ralkap kut in rianṭuantu 24 nunnak a liam, tiah AAPP cazin nih a langhter. Caan a rauh deuh hnu ah cun SAC ralkap nih an tlaihmi hna cu phungrelnak caangkip in an sualnak an kawl hna i, dan an tat hna. Cu hlan deuh ah cun Phungrelnak 505(A) in sual an phawt tawn hna nain, atu hnu ah cun dantatnak faak deuh an ton khawh nakhnga lamdang an kawl i, kum saupi thongtla ding in dan an tat hna, tiah theih a si.
Education department in CDM a tuahtu tlaih le thong thlak a tong mi hna cu atu langhtermi cazin nakin an tam deuh kho, tiah AAPP in chimphuannak nawl ngeitu pakhat nih RFA ah a chim. SAC ralkap nih an hrocer hna ruangah le chungkhar khuasak tintuk harnak ruangah Non-CDM i a kirmi zong an um. SAC ralkap in chimphuannak nawl ngeitu General Zaw Min Htun nih cun CDM in Non-CDM ah a kirmi cu Education department in minung 3156 an um cang, tiah July 16 ahkhan a rak chim.
